QR Bas prokýrory Qairat Qojamjarov tabiǵi monopoliialar sýbektileri jumysyna júrgizilgen aýqymdy tekserýdiń nátijesin jariia etti, dep habarlaidy "Ult aqparat".
«Monopolisterdiń resmi esep-qisaby boiynsha óndiristik kórsetkishterdi jaqsartý boiynsha shyǵyndarǵa 1 trln teńge alynǵan. Biraq, is júzinde qural-jabdyqtardyń tozýy joǵary deńgeide qalyp otyr. Túrli baǵalaýǵa sáikes el boiynsha tozý deńgeii 63 ten 54 paiyzǵa deiin quraidy. Osy ýaqytta Almaty JES-iniń tozýy 70 paiyzǵa deiin, Qapshaǵai men Ekibastuz JES-iniń tozýy 79 paiyzǵa deiin jetip otyr», - dedi ol búgin QR Qaýipsizdik keńesiniń otyrysynda.
Onyń aitýynsha, 2016 jyly «investitsiianyń ornyna tarif» baǵdarlamasy aiaqtalǵannan keiin tariftiń kútilgen tómendeýi oryn alǵan joq.
«Óndirýshiler qazaqstandyqtarǵa energiiany qosarlanǵan stavkamen, iaǵni, burynǵy joǵary tarifpen jetkizýin jalǵastyra berdi. Olardyń tek 15 ǵana tekserý artyq kiristiń 51,5 mlrd teńgeden asyp jyǵylǵanyn anyqtady. Energiia qýaty boiynsha múldem ártúrli kompaniialar úshin birdei shekti tarif zańsyz bekitilgen. Ózindik quny tómen energiia óndiretin kásiporyndar shyǵyn joǵary óndirýshiler tobymen zańsyz birikken», - dedi Qairat Qojamjarov.
Onyń aitýynsha, elimizdiń Energetika ministrligi energiia óndiretin kásiporyndardy jańǵyrtý baǵdarlamasynyń tiimdiligin baǵalamaǵan, monitoring júrgizbegen. Monopolister usynǵan esep-qisaptyń durystyǵyn teksermegen.
«Joǵarylatylǵan tarifti bekitý týraly sheshim halyqtyń múddesine shyǵyn keltire otyra olardyń shyǵystarynyń qysqarǵandyǵyn eskermesten qabyldanǵan. Sondyqtan biz Energetika ministrliginiń zańsyz buiryqtaryna narazylyq engizdik. Qazir olar qaralý satysynda», - dedi Bas prokýror.
