Foto: Úkimet
«Áziret Sultan» murajai-qoryǵy endi memlekettik qorǵaýda bolady. QR Premer-Ministri Oljas Bektenov tiisti qaýlyǵa qol qoidy, dep habarlaidy "Ult aqparat".
Belgili tarihi eskertkish – Qoja Ahmet Iasaýi kesenesi IýNESKO-nyń búkilálemdik mura tizimine engizilgen alǵashqy qazaqstandyq nysan jáne ortaǵasyrlyq sáýlet óneriniń biregei eskertkishterine jatady.
Onyń mańyzdylyǵy men tarihi-mádeni qundylyǵyn eskere otyryp, sondai-aq onyń saqtalýyn qamtamasyz etý maqsatynda Úkimet «Áziret Sultan» murajai-qoryǵyn memlekettik qorǵaýǵa jatatyn obektiler tizbesine engizý týraly sheshim qabyldady.
Nysannyń qaýipsizdigin ishki ister organdarynyń tiisti bólimsheleri qamtamasyz etedi.
Kesene Túrkistan qalasynda túrki aqyny jáne sopylyq ilimniń negizin qalaýshy Qoja Ahmet Iasaýi jerlengen orynda turǵyzylǵan.
Kesene segiz bólmeden turady. Olar Taiqazan turǵan ortadaǵy eń úlken zaldy ainala ornalasqan. 1385-1405 jyldar aralyǵynda keseneniń tóńiregine qosalqy ǵimarattar salynǵan. Búginde murajai-qoryq aýmaǵyna meshit, Úlken jáne Kishi Aqsarai zaldary, kitaphana jáne sharýashylyq kesheni: qudyq, ashana, turǵynjailar (hujralar) jáne t. b kiredi.
