Aimaq basshysy Danial AHMETOV «Nur Otan» partiiasynyń oblystyq filialynda turǵyndardy jeke máseleleri boiynsha qabyldady. Oblys turǵyndaryn alańdatatyn problemalar ártúrli salaǵa qatysty boldy. Atap aitqanda, ótelmei jatqan nesieler, jabylýǵa shaq qalǵan oqý orny men aýyr dertke shaldyqqan balany emdeý siiaqty máseleler qaraldy.
Kezdesýge ádettegidei salalyq basqarmalar men departamentterdiń jetekshileri, aýdandyq jáne qalalyq ákimdikterdiń qyzmetkerleri, sondai-aq, qarjylyq uiymdardyń ókilderi shaqyryldy.
Eń aldymen oblys ákiminiń qabyldaýynda Glýbokoe aýdanynyń turǵyny Valentina Kýkchenko boldy. Ol atalmysh aýdannyń Verh-Berezovka kentindegi tehnikalyq kolledjdiń bolashaǵyna alańdaýshylyǵyn bildirip, aimaq basshysynan kómek surady.
Esterińizge salaiyq, qazirde 240 orynǵa shaqtalǵan kolledjde nebári 110 stýdent bilim alýda. Oblystyq bilim basqarmasynyń basshysy Aijan Sadyqovanyń sózine sensek, júrgizilgen prokýrorlyq tekserý nátijesinde ǵimarattyń standarttarǵa sai emestigi anyqtalǵan. Osyǵan bailanysty oqý ornyn ońtailandyrý jóninde sheshim qabyldanypty.
– Birde-bir stýdentti dalada qaldyrmaimyz. Olar Glýbokoe kentindegi aýdandyq agrarlyq kolledjge aýystyrylady. Al bosaǵan ǵimaratqa Beloýsovkadaǵy kámelettik jasqa tolmaǵandardyń arnaiy mektep-internatynyń oqýshylary kóshirilmek. Osylaisha, birden eki másele sheshimin tappaq, – dedi basqarma basshysy jiynda.
Óz kezeginde Valentina Kýkchenko kolledj ǵimaraty taiaýda ǵana kúrdeli jóndeýden ótkenin aityp, onyń materialdyq-tehnikalyq bazasy aitarlyqtai jańarǵanyn erekshe nazarǵa aldy.
– Buiyrsa, aldaǵy ýaqytta kentimizde jańa óndiris orny ashylady. Bul isti qytailyq kásipkerler júrgizbek. Sheteldiktermen kezdeskenimizde olar kolledjimizdiń stýdentterin is-tájiribeden ótkizip, artynsha jumysqa qabyldaitynyna sendirgen bolatyn. Sondyqtan atalmysh oqý ornynyń jabylýyna jol berilmese eken degen tilegimiz bar, – dedi V.Kýkchenko.
Degenmen, ázirge bul qur sóz ǵana. Muny aimaq basshysy Danial AHMETOV te erekshe atap ótti.
– Meniń qolymda oqý orny qyzmetkerleriniń ózderi qol qoiǵan sheshim bar. Olar kolledjdi jabý týraly ideiany biraýyzdan qoldap otyr. Demek, oqý ornyn jabýǵa sizder, turǵyndar ǵana qarsy bolyp otyrsyzdar. Bul – durys emes. Biz bul kolledjdi birjolata japqaly otyrǵanymyz joq, tek oqytýshylar men stýdentterdi jańa ǵimaratqa kóshiremiz, sony túsinińizder, – degen oblys ákimi quzyrly mekemeler basshylaryna joǵaryda aitylǵan qytailyq investorlarmen taǵy bir márte kezdesip, Verh-Berezovkaǵa qatysty nietterin anyqtaýdy tapsyrdy.
Aimaq basshysy, «Nur Otan» partiiasy oblystyq filialynyń tóraǵasy Danial AHMETOVTIŃ qabyldaýyna kelgen kelesi azamatsha Tóletai Tanekenova «Jumyspen qamtý-2020» baǵdarlamasy boiynsha alynǵan nesielerdiń qaitarylý problemasyna toqtaldy. Belgili bolǵandai, atalmysh memlekettik baǵdarlama aiasynda «Ertis» áleýmettik-kásipkerlik korporatsiiasy» UK» AQ-nan nesie alǵan oblysymyzdaǵy 480-nen astam sharýa qojalyǵynyń basym bóligi, naqtyraq aitsaq, 95 paiyzy búginde qaryzdaryn qaitarmai keledi.
Ulttyq tutynýshylar ligasy oblystyq filialynyń direktory Tóletai Tanekenovanyń sózine qaraǵanda, búginde ásirese, «Bajalar A&E», «Tana» jáne «Saǵyr Nesie» siiaqty seriktestikterdiń jaǵdaiy qiyn bolyp tur. Bulardyń qaryzdy qaitara almaýynyń obektivti sebepteri bar. Sondyqtan kásipkerler aimaq basshylyǵynan nesielerin óteý merzimin bes jyldan jeti jylǵa deiin uzartýdy suraidy.
Degenmen, oblys ákimi qaryzyn ýaqytynda qaitarmaǵandarǵa eshqandai jeńildik bolmaitynyn kesip aitty.
– Bul nesieler biýdjettik qarajat esebinen berilgenin umytpańyzdar. Al biýdjet óz kezeginde oblys halqynyń salyq tólemderinen quralady. Demek, ainalyp kelgende osyndai birli-ekili kásipkerdiń qaryzyn qalǵan turǵyndar óteýge májbúr bolady degen sóz. Bul áste durys emes. Sondyqtan eshkimge jeńildik jasamaimyz. Moiyndaryna alǵan barlyq mindetti oryndaýlary tiis, – degen oblys ákimi Danial AHMETOV 2011 jyly kásipkerlerge berilgen 1 milliard 100 myń teńge kólemindegi nesieniń 385 milliony áli qaitarylmaǵanyn jetkizdi.
Aimaq basshysy sondai-aq, endi nesiesin ótei almai júrgen kásipkerler birinshi kezekte aiyppul men ósimaqyny emes, qaryzdyń negizgi somasyn qaitarýǵa mindetti ekenin aitty.
Sonymen qatar, oblys ákimi bul kúni Ulan aýdanynyń turǵyny Alina Álipovany qabyldady. Ol aimaq basshysynan baýyr tsirrozyna shaldyqqan uly Dastan Toqbaevtyń em-domyna qarjylai kómek kórsetýin surady. Aimaq basshysy balaqaiǵa tiisti kómek kórsetiletinin jetkizdi.
Nurjan Kenjeuly
