Qostanai oblysynyń Jangeldin aýdanynda bir top jas atqa minip, Memlekettik tý sherýin uiymdastyrdy, dep habarlaidy "Ult aqparat".
Jangeldin aýdany ishki saiasat basqarmasynyń málimetinshe, bul bastama QR Prezidenti Qasym-Jomart Toqaevtyń Memlekettik týdy keńinen qoldaný týraly usynysynan keiin týyndaǵan. Sherý uiymdastyrý ideiasyn aýdan jastary da qoldap, ózderiniń oilaryn ortaǵa salǵan.
«Týdy úilerdiń qabyrǵasyna ilý týraly da aitylyp jatty. Biraq aqyldasa kele, Tý ustap, atqa qonýdy durys dep taptyq. Memleket basshysy elimizdiń memlekettik rámizderin, atap aitqanda, QR Memlekettik týyn keńinen qoldaný týraly usynysyn qoldaitynyn jetkizdi. Rasymen de, rámizder – basty bailyǵymyz. Ol eshqashan dárejesinen túspeýi tiis. Torǵailyq jastardyń da kózdegeni osy boldy. Qazirgidei qiyn ýaqytta kóp adam jinaýǵa bolmaidy. Degenmen el eńsesin kóteretin osyndai bastamalarǵa jol ashyq», - deidi sherýge qatysýshylardyń biri Shyńǵys Tóleýhan.
Atqa mingen jigitter aýyl turǵyndary men qonaqtarynyń nazaryn aýdardy. Uiymdastyrýshylardyń aitýynsha, sherýdi uiymdastyrý kezinde barlyq sanitarlyq talaptar saqtaldy.
