Qostanailyq volonter jastar aýrýhana qyzmetkerlerine kómektesýde. Bastamany oblystyq jastar saiasaty basqarmasy usynǵan, dep habarlaidy "Ult aqparat".
Qostanai qalasynyń emhanalary ottegi toltyrylǵan ballondardy, dári-dármek ónimderin tasý jumystaryna adam qajet ekenin aityp, áleýmettik jelilerge jazba qaldyrǵan. 11 shildeden bastap Qostanai oblysy ákimdiginiń jastar saiasaty máseleleri jónindegi basqarmasynyń basshylyǵy tiisti kómek kórsetý úshin qala eriktileriniń jiynyn uiymdastyrdy.
«Osynaý qiyn shaqta birlik tanytýymyz qajet. Sonda ǵana qaýipti indetti jeńemiz. Qazir virýspen kúreste dárigerlerdiń aldyńǵy shepte júrgeni málim. Sol sebepti bizdiń basqarma oblys turǵyndaryna úndeý jariialap, kómektesýge shaqyrdy. Bul úndeýge ártúrli jastaǵy, túrli kásip ókilderi ún qatty. Máselen, birinshi kúnnen bastap mádeniet qyzmetkerleri, jeke kásipkerler, stýdentter, órt sóndirýshiler bizben birge. Qazir ottegi ballondaryn emhanalarǵa jetkizý jumystarymen ainalysyp júrmiz. Búgin óńirdegi sý tasýshy kompaniia habarlasyp, aýyzsý jetkizýge kómektesetinin aitty. Mundai jumystar jalǵasady», - dedi basqarma basshysynyń mindetin atqarýshy Saiat Shaimurynov.
Volonterler jumys tańdap jatqan joq. Kúnde shamamen 10-15 adam «qara» jumysta júr. Solardyń biri – kásipker Nurjan Sárinjipov.
«Biz dostarymyzben kómek kórsetýge keldik. Qazir qalalyq aýrýhananyń bazasynda tapsyrylǵan sharýalarǵa qol ushyn sozyp jatyrmyz. Qolymyz qalt etkende meditsina qyzmetkerlerine kómektesýge ýáde ettik. Ákimdik, ia bolmasa, aýrýhana basshylyǵynyń nusqaýy bolǵan emes. Áleýmettik jelilerden eriktilerdiń usynysyn kórip, qabyl aldyq. Bir kislorod ballony bir naýqasqa tezirek jetse degen tilek qana. Tańǵy 9-dan bastap osynda júrmiz. Qoldan kelgenshe kómekti aiamaimyz», - deidi kásipker.
Volonterler búgin keshke deiin qalalyq provizorlyq statsionarda ottegi toltyrylǵan ballondardy túsirmek.
