Qostanai oblysy politsiia departamentiniń qyzmetkerleri Murat Álmaǵambet pen Nurdáýlet Júsip sýitsid jasamaq bolǵan qyzdy aman alyp qaldy, dep habarlaidy "Ult aqparat".
Vedomstvonyń baspasóz qyzmeti taratqan aqparatqa súiensek, tártip saqshylary ákimshilik aýmaqta reid jasap júrgen.
«Olar úidiń besinshi qabatyndaǵy balkonda turǵan qyzdy kóredi. Politseiler dereý saqtyq sharalaryn qabyldady. Murat Álmaǵambet qyzben sóilesý úshin besinshi qabatqa kóterildi, al Nurdáýlet Júsip syrtta turdy. Páterge kirgen tártip saqshysy balkonnan sekirip ketpek bolǵan qyzdy ustap qaldy. Keiin ol meditsina qyzmetkerlerin shaqyryp, qyzǵa kómek kórsetti», delingen baspasóz habarlamasynda.
Belgili bolǵandai, 26 jastaǵy qyz otbasylyq daý-damaidan soń sýitsid jasamaq bolǵan. Aita ketý kerek, «102» atalmysh fakti boiynsha habarlama túspegen.
Adam ómirin saqtap qalǵan politsiia kapitany Murat Álmaǵambetov ishki ister organdarynda 2006 jyldan bastap qyzmet etedi. Politsiia leitenanty Nurdáýlet Júsiptiń eńbek ótili – 5 jyl.
