Qostanai qalasyndaǵy Gagarin kóshesiniń ataýy ózgerýi múmkin. Osy máselege qatysty qalalyq ákimdikte qoǵamdyq tyńdaý ótti, dep habarlaidy QazAqparat tilshisi.
Qoǵamdyq tyńdaýda bastamashyl toptyń ókilderi baiandama jasady. Avtomobil transporty kolledjiniń tehnikalyq bóliminiń basshysy Vladimir Zakaliýjnyidyń sózinshe, pedagogtar men stýdentter qaladaǵy Gagarin kóshesin QR Tuńǵysh Prezident atyndaǵy dańǵylǵa ainaldyrý jóninde ujymdyq hat jazǵan.
«QR Prezidenti Q.Toqaev Tuńǵysh Prezidentimiz N.Nazarbaevtyń esimin oblys ortalyqtaryndaǵy kóshelerdiń birine berý týraly bastama kóterdi. Bizdiń ujym muny biraýyzdan qoldady. Elbasynyń strategiialyq bastamalarynyń arqasynda Qazaqstan integratsiialyq úderisterdiń basty lokomotivine ainaldy. Respýblikamyz iri jáne bedeldi halyqaralyq uiymdardyń belsendi qatysýshysy sanalady. Nursultan Nazarbaev ekonomikany qajetti eńbek resýrstarymen qamtamasyz etý máselesinde tehnikalyq jáne kásiptik bilim berýdi damytýǵa erekshe mán berdi. Bizdiń kolledj Gagarin kóshesinde ornalasqan. Iýrii Gagarin – ǵaryshqa ushqan alǵashqy adam. Álemdegi alǵashqy ǵaryshkerdiń aty umytylmaidy. Alaida, Elbasynyń eńbegi laiyqty baǵasyn alýy tiis», – dedi Vladimir Zakaliýjnyi.
Kolledjdiń usynysyn «AgromashHolding» kásipornynyń direktory Sergei Mogilatov ta ilip áketti.
- Qoǵamdyq tyńdaýda el pikiri, usynystary talqyǵa túsedi. Sol sebepti, qazirgi Gagarin kóshesiniń boiynda ornalasqan bizdiń kásiporyn ujymy kolledjdiń bastamasyn qoldaidy. Óitkeni, 1982 Nursultan Nazarbaevtyń bastamasy arqyly Qostanai dizel zaýyty ashyldy. Sodan bastap, óńirde mashina qurastyrý salasy qaryshtap damydy. Biyl munda 24 myń avtokólik shyǵarylady, - dedi kásiporyn direktory.
Bastamashyl top Iýrii Gagarin esimin Gvardeiskii kóshesine kóshirý týraly máseleni mańyzdy dep esepteidi. Máslihat depýtattary bul usynysty tolyǵymen qoldady. Al Gagarin kóshesin QR Tuńǵysh Prezident atyndaǵy dańǵylǵa ainaldyrý usynysy respýblikalyq onomastikalyq komissiiada qaralatyn boldy.
