Foto: gov.kz
Qostanai oblysynda birneshe jasóspirim internet arqyly "tabys tabamyz" degen syltaýmen alaiaqtyq shemasyna qatysqan. Qazir olarǵa qatysty qylmystyq is qozǵaldy, dep habarlaidy Ult.kz.
Politsiianyń málimetinshe, Sherbakovo jáne Qashar kentterinde turatyn 13-14 jastaǵy oqýshylar belgisiz adamdardyń ótinishimen ondaǵan SIM-kartany tirkep, olardy úshinshi tulǵalarǵa paidalanýǵa bergen. Keiin bul nómirler alaiaqtar tarapynan messendjerlerde jalǵan akkaýnttar ashý jáne turǵyndardy aldaý úshin qoldanylǵan.
Alaiaqtar azamattarǵa "eseptegishterdi tekseremiz" nemese "sizge sálemdeme keldi" degen habarlamalar jiberip, osylaisha 8 million teńgege jýyq ziian keltirgen.
Tergeý barysynda tártip saqshylary kúdiktilerdiń telefondaryn jáne SIM-kartalaryn tárkilegen. Jasóspirimder óz kinásin moiyndaǵan. Qazir politsiia qylmystyq shemanyń ózge de qatysýshylaryn anyqtap jatyr.
Sonymen qatar, Sherbakovo aýylynda taǵy bes oqýshy dál osyndai jolmen áreket etkeni belgili boldy. Olardyń ata-analary zańǵa sáikes jaýapkershilikke tartylady.
Politsiia azamattarǵa eskertý jasady: basqa adamdarǵa tirkelgen SIM-kartalardy jalǵa berý nemese satý zańmen tyiym salynǵan jáne ol alaiaqtyq pen ózge de qylmystarǵa jol ashady.
