Foto: polisia.kz
Qostanai oblysynyń Rýdnyi qalasynda úsh politsiia qyzmetkeri qamaýǵa alyndy, dep habarlaidy oblystyq politsiia departamentiniń baspasóz qyzmeti.
Olar 17 naýryz kúni ustalǵan. Arnaiy operatsiiaǵa oblystyq politsiia departamentiniń jeke qaýipsizdik bólimi men Ulttyq qaýipsizdik komitetiniń óńirlik departamenti birlesip qatysqan.
Vedomstvo kúdiktilerge qatysty naqty qandai aiyp taǵylǵanyn ashyp aitpady.
«Rýdnyi qalasy politsiia basqarmasynyń úsh qyzmetkeri quqyqqa qaishy áreketter jasady degen kúdikpen ustaldy», – delingen resmi habarlamada.
Qazir úsh qyzmetker de qamaýda otyr. Olarǵa qatysty qylmystyq is boiynsha tergeý júrip jatyr.
