Pixabay
Qostanaida órt saldarynan 7 jastaǵy qyz jedel járdem kóliginde kóz jumdy. Onyń anasy aýyr jaǵdaida jansaqtaý bóliminde jatyr, dep habarlaidy Sputnik Qazaqstan.
Qostanai oblystyq tótenshe jaǵdailar deparatamentiniń málimetinshe, órt 24 qarashada turǵyn úilerdiń birinde shyqty.
Órt týraly habarlama saǵat keshki 17.20-da kelip túsken. Órt sóndirýshiler janyp jatqan úige tórt minýtta jetti.
Tótenshe jaǵdailar qyzmeti kelgende alty páterli kirpish úidiń bir páteriniń qabyrǵasy men tóbesi janyp jatty. Órttiń aýmaǵy 50 sharshy metr.
"Órt sóndirýshiler úiden tórt adamdy alyp shyqty. Qostanai qalalyq aýrýhanasyna 1977 jyly týǵan áiel adam jetkizildi. Onyń denesiniń 80-85 protsentin kúiik shalǵan. Qazir ol jansaqtaý bóliminde jatyr. Jaǵdaiy asa aýyr dep baǵalandy", - delingen habarlamada.
1975 jyly týǵan er adamnyń qoly men beti kúigen. Ol dárigerlerdiń tekserýinen keiin úige jiberildi.
Erli-zaiyptylardyń 7 jastaǵy qyzy aýrýhanaǵa jetpei, jádel járdem kóliginde kóz jumdy.
Órtti sóndirý kezinde kórshi páterden 8 jastaǵy taǵy bir bala tabyldy. Onyń jaǵdaiy qanaǵattanarlyq. Balaǵa meditsinalyq kómek qajet bolmady.
Órttiń shyǵý sebebi anyqtalyp jatyr. Órt saǵat 18.25-te tolyqtai sóndirildi. Ony sóndirýge 26 adam men jeti tehnika jumyldyryldy.
