© Sputnik / Abzal Kaliev
Qostanai qalasynda bótenniń múlkin jymqyrý arqyly birneshe ret jasalǵan alaiaqtyq faktisi boiynsha qylmystyq is qaraldy. 2024 jylǵy qarashadan 2025 jylǵy naýryzǵa deiin sottalýshy mektepterdiń birinde muǵalim ári kásipodaq uiymynyń tóraǵasy bolyp jumys istegen.
Ol qyzmetkerlerdiń derbes derekterine qol jetkize otyryp, solardyń atyna túrli mikroqarjy uiymdarynan onlain-qaryz rásimdegen. Kásipodaq tarapynan materialdyq kómek kórsetý syltaýymen jáne ózge de oidan shyǵarylǵan negizdermen qyzmetkerlerdi sendirip, mikroqarjy uiymdarynda onlain beine-verifikatsiiadan ótýin uiymdastyrǵan.
"Alynǵan qarjy sottalýshynyń banktik shotyna túsip otyrǵan. Alynǵan aqshalai qarajattyń bolmashy bóligi mektep qyzmetkerlerine materialdyq kómek retinde berilip, qalǵan soman aiyptalýshy óz qalaýynsha jumsaǵan", - deidi sot.
Nátijesinde 3,6 mln teńgeden astam materialdyq zalal keltirilgen. Sotta ol óz kinásin moiyndap, jasaǵan isine ókinish bildirdi.
"Sot onyń jeke basyn, jasalǵan áreketterdiń qoǵamdyq qaýiptilik sipaty men dárejesin, jábirlenýshilerge keltirilgen materialdyq zalaldyń ishinara ótelýin eskere otyryp, 3 jyl 6 ai merzimge bas bostandyǵyn shekteý jazasyn, jaza merziminiń búkil kezeńine probatsiialyq baqylaý belgileýmen, sondai-aq 5 jyl merzimge kásipodaq basqarma tóraǵasy laýazymdaryn atqarý quqyǵynan aiyrý jazasyn taǵaiyndady", - delingen habarlamada.
Raqymshylyq jasaý týraly zańǵa sáikes ol túpkilikti óteýge 2 jyl 9 ai 18 kún bas bostandyǵyn shekteý jazasy belgilendi.
