Foto: Polisia.kz jariialaǵan videodan skrinshot
Qostanaida meditsina qyzmetkerleriniń kóligin urlap ketken kúdikti ustaldy. Bul týraly Polisia.kz habarlady.
Oqiǵa 19 qyrkúiekke qaraǵan túni bolǵan. Qostanai politsiiasy naýqastyń shaqyrtýyna kelgen jeke klinika dárigerleriniń kóligi urlanǵany týraly habar alǵan. Tártip saqshylary birden "Ustaý" josparyn jariialady.
Kúdiktini qolǵa túsirý barysynda 39 jastaǵy júrgizýshiden ishimdiktiń iisi shyǵyp turdy. Alaida ol meditsinalyq tekserýden bas tartty.
Politseilerdiń zańdy talaptaryn oryndamaǵany úshin sot oǵan 15 táýlikke qamaýǵa alý jazasyn taǵaiyndady jáne segiz jyl merzimge kólik quralyn basqarý quqyǵynan aiyrdy.
Kólikti zańsyz aidap ketý faktisi boiynsha qylmystyq is qozǵaldy, endi qostanailyq azamat eki jylǵa deiin bas bostandyǵynan aiyrylýy múmkin.
