Qostanai qalasy ákiminiń orynbasary Rústem Karkenov oblys ortalyǵynda qandai jaǵdaida karantin jariialanýy múmkin ekenin túsindirdi, dep habarlaidy QazAqparat.
«Qostanai qalasyndaǵy sanitarlyq beketter adamdardyń ary-beri júrýine shekteý qoimaidy. Qalada karantin rejimin jariialaý úshin qalada koronavirýs juqtyrýdyń birneshe jaǵdaiy tirkelýi kerek. Alaida virýstyń tirkelýin kútpei-aq sanitarlyq baqylaýdy kúsheitkimiz keledi. Osy maqsatta qalany ainala blok beketterdi ornatyp jatyrmyz», - dedi Rústem Karkenov Aimaqtyq kommýnikatsiialyq qyzmetinde ótken baspasóz máslihatynda.
Qala ákiminiń orynbasary Qostanaida ornatylatyn 7 blok bekette adamdardyń temperatýrasy ólshenetinin aityp ótti.
«Ázirge bizde teplovizor joq. Endi ǵana satyp alyp jatyrmyz. Áitse de árbir sanitarlyq bekette temperatýra ázirge gradýsniktermen ólshenedi. Eger árbir adam óziniń gradýsnigimen qyzýyn teksertkisi kelse, ol ony paidalana alady. Sonymen qatar blok beketterde eldegi tótenshe jaǵdailar kezindegi shekteý sharalary qadaǵalanady. Atap aitqanda maska kiip júrý, 22.00-den keiin júrmeý sekildi talaptar saqtalady», - dedi ol.
Rústem Karkenov sanitarlyq talaptardy buzǵandarǵa ákimshilik jaýapkershilik baryn eskertti.
«Bári de bul istiń bári turǵyndardyń amandyǵy úshin jasalyp jatqanyn túsinýi kerek. Osylaisha biz qalada koronavirýs infektsiiasynyń tirkelýine, jappai taralýyna shekteý qoia alamyz», - dedi ol.
Aita ketsek buǵan deiin Qostanai qalasy ákiminiń orynbasary Rústem Karkenov búgin saǵat túngi onnan bastap qaladaǵy úsh blok beket jumysyn bastaitynyn málim etken edi.
