Qostanai oblysynda bir adamnyń koronavirýstan kóz jumýyna bailanysty klinikalyq tergeý jumystary júrgizilýde, dep habarlaidy "Ult aqparat".
«Epidemiologiialyq tergeý áli júrip jatyr. Bul tergeý júrgizý úshin aldymen aýrýdan kóz jumǵan adammen bailanysta bolǵandardy anyqtaý kerek. Al emdeýge qatysty suraqtarǵa klinikalyq tergeý jumystary aiaqtalǵan soń ǵana jaýap bere alamyn. Buǵan qatysty jumystar júrgizilip, qajetti qujattar alyndy. Bul adamdar shynymen elordada bolǵany týraly aita alamyn, biraq olardyń Nur-Sultanda bolǵanyna uzaq ýaqyt bolǵan jáne inkýbatsiialyq kezeń de ótip ketti», - deidi Qostanai oblysy Taýarlar men qyzmetterdiń sapasy men qaýipsizdigin baqylaý departamentiniń basshysy Oral Bekmaǵambetov.
Ol koronavirýstan kóz jumǵan adam aýrýdy Qostanaiǵa kelgen soń juqtyrýy múmkin ekenin aitty.
«Olardyń aýrý juqtyrý kózi elordada emes bolýy da múmkin. Olar aýrýdy oblysqa oralǵan soń juqtyrǵan bolýy múmkin. Karantin ne úshin kerektigine osy jaǵdai mysal bola alady. Tergeý jumystary aiaqtalǵan soń resmi aqparatty beretin bolamyz», - deidi ol.
Buǵan deiin Qostanaidy koronavirýstan bir adam qaitys bolǵany týraly jazǵan bolatynbyz. Ol Jetiqara qalasynyń 1945 jyly týǵan turǵyny bolǵan.
