Beeline kompaniiasy Qostanai qalasynda «aqyldy» qurylǵylarǵa arnalǵan jańa jelini taratty, dep habarlaidy beeline.kz.
Basylym málimetinshe, bul joba «QazTransGaz» kompaniiasymen jasalǵan memorandým aiasynda júzege asyrylýda. Jańa joba NB-IoT tehnologiiasy arqyly gaz eseptegish qurylǵysynyń kórsetkishin qashyqtyqtan baqylayǵa múmkindik beredi.
Internet jabdyqtary úshin jasalǵan jańa jeli Qazaqstanda buryn-sońdy bolmaǵan edi. Atalmysh joba «Tsifrlyq Qazaqstan» memlekettik baǵdarlamasyn júzege asyrýdy qoldaý baǵytynda atqarylyp jatyr eken.
«Qazaqstanda mundai joba joq. Qurylǵylar arasynda derek almasý tehnologiiasy óte tez enip jatyr. Sondai-aq, Beeline osy sala boiynsha kósh bastap tur. IoT-tyń arqasynda qurylǵylardyń jumysyn qashyqtan baqylap qana qoimai, derekterdi jinaý protsesin avtomattandyrý arqyly, adami faktor áserin tómendetýge bolady. Bul – «Tsifrlyq Qazaqstan» baǵdarlamasyn júzege asyrýdy qoldaý jolyndaǵy mańyzdy qadamdardyń biri», – dep atap ótti Beeline-nyń korporativtik biznesti damytý jónindegi kommertsiialyq direktory Raýan Qabdrahimov.
Jańa tehnologiialardy qoldaný óz kezeginde «Internet jabdyqtaryn» keńinen paidalanýǵa mol múmkindik beredi. Máselen, kógildir otyn jabdyqtaýshylary gazdyń berilý turaqtylyǵy men onyń shyǵynyn qashyqtyqtan qadaǵalai alady. Al, aqaý bolsa avtomatty túrde birden joiylady. Eń bastysy – gaz jelisine zańsyz qosylatyn qylmystardy aldyn alýyna septigin tigizedi.
Internet jabdyqtary (IoT - Internet of Things) — málimetterdi joldaý tehnologiiasy arqyly bailanystyrylǵan nysandar jelisi. Bul óz kezeginde ártúrli qurylǵylardan kelip túsetin derekterdi jinaqtap, derektermen almasýǵa qabiletti bolyp otyr.
NB-IoT (NarrowBand IoT ili NarrowBand Internet of Things) – uialy bailanys operatorynyń qurylǵylar arasynda málimet almasýǵa arnalǵan standarty. Bul litsenziiadan ótken jáne qorǵalǵan. NB-IoT standartynyń erekshelikteri sońǵy qurylǵylardyń (esepteýishterdiń, tetikterdiń, sensorlardyń jáne taǵy basqalardyń) ózara tiimdi bailanysýyna jáne qaýipsiz qosylýdyń joǵary deńgeiin qoldanýǵa múmkindik beredi. Sonymen qatar, energiia tutynýdy tómendetýge jaǵdai jasaidy. Nátijesinde aspaptar akkýmýliatorynyń qyzmet etý merzimi 10 jylǵa deiin uzarady. Aita ketetin jait, NB-IoT tehnologiiasy bir uiashyqqa 100 myńnan astam qurylǵyny qosýǵa múmkindik beredi.
