Áleýmettik jelide eki er adamnyń dámhana qyzmetkerin balaǵattap, oǵan qol kótergen videosy tarady, dep habarlaidy "Ult aqparat" Tobolinfo.kz portalyna silteme jasap.
20 shilde kúni Qostanaidaǵy dámhanalardyń birinde er adam men bar daiashysy janjaldasyp qalǵan. Dámhana qyzmetkerine qol kótergen azamattardyń boks jattyqtyrýshysy ekeni anyqtaldy.
"Qostanai oblysy boks federatsiiasynyń boks jattyqtyrýshylary Qýanysh Kýlikov pen Dáýlet Tanabaev dámhanadaǵy bar daiashysyna qol kóterdi. Mundai áreketterge jol berýge bolmaidy, dereý tergeý júrgizip, laiyqty jazalanýyn talap etemiz. Oqiǵanyń kýágerlerinen bailanysqa shyǵýyn suraimyz. Mundai jattyqtyrýshylar men ustazdar bolashaq chempiondardy, sportshy balalardy qalai tárbieleidi? Zorlyq-zombylyq pen agressiia jazasyz qalmaýy kerek. Bul, ásirese, basqalarǵa úlgi bolatyn adamdarǵa qatysty. Olar bolashaq chempiondardy tárbieleýge laiyq pa", – delingen jazbada.
Beinejazbadan eki er adamnyń bar daiashysyn balaǵattap, keiin onyń jaǵasynan ustap, qol kótergenin baiqaýǵa bolady. Oblystyń sport basqarmasy bolǵan jaǵdaiǵa qatysty pikir bildirdi.
"Qostanai oblysy ákimdiginiń dene shynyqtyrý jáne sport basqarmasy oblystyq boks federatsiiasymen birlesip jumys tobyn qurady. Bul másele sport jónindegi keńestiń taiaýdaǵy otyrysynda qarastyrylady", – dep málimdedi vedomstvo.
Politsiia departamentiniń ókilderi atalǵan derekke bailanysty janjalǵa qatysýshylardy jaýapqa tartý máselesi qarastyrylyp jatqanyn aitty.
