10-14 qarasha kúnderi qostanailyq politsiia qyzmetkerleri adam saýdasyna bailanysty qylmystardyń aldyn alýǵa, jolyn kesýge baǵyttalǵan «STOP-trafik» jedel is-sharasyn ótkizdi, dep habarlaidy "Ult aqparat" oblystyq politsiia departamenti baspasóz qyzmetine silteme jasap.
Aktsiia barysynda oiyn-saýyq oryndary, monsha keshenderi, saýnalar, jalǵa berilgen páterler, qonaq úiler, sondai-aq sharýa qojalyqtary men qurylys nysandary tekserildi.
«STOP-trafik» ótkizý qorytyndysy boiynsha Qostanai oblysy PD kriminaldyq politsiia basqarmasynyń qyzmetkerleri adam saýdasy jáne jezókshelikpen ainalysýdyń birneshe faktisin anyqtady. «Progress katalizatory» jeke qorymen birlesip, adam saýdasynyń qurbany bolǵandardy arnaýly áleýmettik qyzmet kórsetý ortalyǵyna ornalastyrdy.
«Adamdy bas bostandyǵynan zańsyz aiyrý faktileriniń biri B.Mailin atyndaǵy aýdanda tirkelgen. Qairankól aýylynyń mańyndaǵy sharýashylyqta 33 jastaǵy turǵyn 2018 jyldyń sáýir aiynan bastap 2020 jyldyń qyrkúiek aiyna deiin 21 jastaǵy jigitti jaiylymda úi malyn qaraý boiynsha jumys isteýge májbúrlegen. Atalǵan fakti boiynsha QR QK 126-baby 3-bóligi 2-tarmaǵymen qylmystyq is tirkeldi.
Sondai-aq jedel aldyn alý is-sharasy barysynda tártip saqshylary oblys ortalyǵynda 2000 jáne 2001 jyly týǵan apaly-sińili qyzdardy jezókshelikpen ainalysýǵa májbúrlegen 28 jastaǵy áieldi ustady. Atalǵan derek QR Qylmystyq kodeksiniń 308-baby 1-bóligi boiynsha qylmystyq is retinde tirkeldi», - deidi oblystyq Politsiia departamenti baspasóz qyzmetindegiler.
