Áýliekól aýdanynda 8 jylqy men 4 siyrdy aidap áketken urylar toby qolǵa tústi, dep habarlaidy "Ult aqparat" oblystyq politsiia departamentiniń baspasóz qyzmetine silteme jasap.
Birneshe adamnyń malyn urlaǵan kúdiktilerdi Áýliekól aýdanynyń politseileri ustady. Aýdandyq politsiia bólimine ótken jyldyń tamyz aiynan bastap turǵyndardan mal urlyǵy týraly aryz túse bastady. Jergilikti turǵyndardyń aitýynsha, bir úiir jylqy men iri qara mal jeke sharýashylyqtardyń aýmaǵynan joǵalyp ketken.
Politseiler jedel is-sharalar ótkize bastady. Áýliekól aýdandyq politsiia bólimi bastyǵy Janserik Hasanov aitqandai, jedel ýákilder Novonejin aýylynda turatyn 46 jastaǵy áiel bastaǵan qylmystyq topty anyqtaǵan. Onyń quramynda taǵy 4 adam bolǵan.
«46 jastaǵy áiel urlyqtyń shemasyn jasaǵan. Aldymen «Vaz-2107» avtokóligi arqyly aýyldardy aralap, sharýashylyqtaǵy maldardy baqylap alady. Keiin kúdiktilerdiń biri jaiylyp júrgen maldy arnaiy orynǵa aidap aparǵan, al qalǵandary maldy baýyzdap otyrǵan. Politsiia qyzmetkerleri Shili, Pervomai jáne Diev aýyldarynan urlanǵan maldyń aman qalǵanyn jábirlenýshilerge qaitardy. Tergeý amaldary júrgizilip jatyr», - deidi politsiianyń baspasóz hatshysy Irina Bejenar.
Qazir urylardyń ústinen QR QK 188-baby boiynsha is qozǵaldy. Olardyń kinási dáleldense, 5 jyldan 10 jylǵa deiin sottalýy múmkin.
