Foto: IIM baspasóz qyzmeti
Qostanai oblysynda joǵalǵan qyz tabyldy, - dep habarlaidy IIM baspasóz qyzmeti.
24 qyrkúiekte keshke Fedorov aýdandyq politsiia bólimine áiel qyzy joǵalǵanyn habarlaǵan. Onyń aitýynsha, týǵannan beri sóileý qabileti buzylǵan ári damýynda ereksheligi bar qyzy úiden belgisiz baǵytqa ketip qalǵan. Bala úiden jeńil kiimde shyqqan.
Túnde 300 shaqty adam aýyldy, mańaidaǵy egistik pen orman alqaptaryn túgel qarap shyqqan. Tańǵy beske qarai izdeýge Qostanaidan, Qostanai aýdany men Rýdnyidan qosymsha kúshter jiberilgen. Tańerteń izdeýge 500-den asa adam qatysqan, ushqyshsyz ushý apparattary qoldanylǵan.
"Tańǵy saǵat 8 shamasynda aýyldan eki shaqyrym jerdegi orman beldeýin tintý barysynda tórt politseiden quralǵan top qyzdy baiqap qaldy. Adamdardy kórgende ol áýeli qashpaq boldy, alaida keiin toqtap, óz erkimen politseilerge qarai shyqty. Sanaýly minýttardan soń qyz anasymen aman-esen qaýyshty", - dep jazylǵan habarlamada.
