Qostanai oblysynda burshaq jaýyp, surapyl jel turýy saldarynan 40 úi shatyrynyń qurylysy búlindi, dep habarlaidy alau.kz.
«8 maýsym kúni saǵat 17.40-ta Qostanai oblystyq TJ departamentiniń kezekshilik qyzmetine Qostanai-2 turǵyn úi alabynda qatty jel saldarynan úilerdiń shatyrlary ushyp jatqandyǵy jaily habarlama kelip tústi. Oqiǵa ornyna Qostanai oblysy TJ departamenti jáne Qostanai TJ basqarmasynyń jedel toptary jetti», - dep habarlaidy Qostanai oblystyq TJ departamentiniń baspasóz qyzmeti.
TJD qyzmetkerleri Qostanai-2 turǵyn úi alabynda 37 jer úidiń shatyry qiraǵandyǵyn anyqtady. Búlingen jerler aýmaǵy shamamen 1512 sharshy metrdi qamtidy. Qurban bolǵandar joq. 38 jastaǵy zardap shekken áielge alǵashqy meditsinalyq kómek kórsetildi. Saǵat 19.50 kezinde oqiǵa ornynda qatty jel saldarynan búlingen jerlerdi qalypqa keltirý maqsatynda jedel shtab quryldy.
«Jel saldarynan qiraǵan jerlerdi qalpyna keltirýge 25 tehnika jáne 85 adam jumyldyryldy. Onyń quramynda Qostanai oblystyq TJD, Soltústik ÓAJQT, «QazTransGazAimaq», «Forfait» EPK, Qostanai ákimdiginiń TKSh bar», - delingen Qostanai oblystyq TJD habarlamasynda.
