Qostanai oblysynyń mektepterinde ata-analardyń kelisimimen oqýshylar úshin qosymsha sabaqtar ótkizilýi múmkin. Bul týraly Óńirlik kommýnikatsiialar alańynda ótken brifingte Qostanai oblysy ákimdigi bilim basqarmasynyń basshysy Záýre Baimenova aitty, dep habarlaidy "Ult aqparat".
Basqarma basshysy aitqandai, 3-toqsandaǵy oqytý formatynda birqatar ózgerister bar. 9, 11 synyp oqýshylarynyń aralas oqytý formatyna kóshýi qorytyndy attestattaý jáne ulttyq biryńǵai testileý daiyndyǵyna negizdelgen. Qazir bul synyptar ata-analardyń kelisiminsiz aralas formatta jumysqa kiristi.
«Qashyqtan oqytýdy 114 mektep júzege asyrady. Munda 38,5 myńǵa jýyq oqýshy bilim alady. 3-toqsanda 6 mekteptiń janyndaǵy internattyń jumysy qaita jalǵasady. Sondai-aq, oblystyq daryndy balalarǵa arnalǵan mektep-internattary da bilim berýdiń qalypty júiesine kóshti. Osy toqsanda ata-analar jáne pedagogtardyń kelisimimen sany 5 balaǵa deiingi toptarda qosymsha sabaqtar ótkizilýi múmkin. Budan bólek sabaqtan tys ýaqytta jeke konsýltatsiialar uiymdastyrylady. Munyń bári osy ýaqytqa deiin jiberilgen olqylyqtardyń ornyn toltyrý úshin jasalyp otyr», - deidi Záýre Báimenova.
Oblys kolledjderiniń stýdentteri úshin de oqytý formaty ózgerdi. Ekinshi semestrde kolledjderdiń birinshi kýrs stýdentteri shtattyq formatta oqýǵa kóshti. Óitkeni olar úshin oqytýshylar korpýsymen tikelei jumys isteý mańyzdy.
«Mektepke deiingi balalar uiymdary jumysyn kezekshi toptar formatynda jalǵastyrýda. Qaýlyǵa sáikes toptarda shuǵyldanatyndar sany 15 adamnan aspaidy, jumys rejimi saǵat 9:00-den 20:00-ge deiin belgilendi. Balalar sektsiialarynyń, úiirmelerdiń, fakýltativterdiń jumysyna demalys jáne mereke kúnderi ruqsat berilmeidi», - dedi basqarma basshysy.
