Biyl Qostanai oblysynda 50 myń avtokólik naryqqa shyǵarylmaq. Mamandar muny otandyq ónimge degen suranystyń artqany dep otyr. «QazAqparat» tilshisi jergilikti avtozaýytqa baryp, kólik shyǵarý isimen etene tanysyp qaiqan bolatyn.
Qazaqstannyń avtomobil ónerkásibiniń tarihy jol talǵamaityn «Niva» jeńil kólik qurastyrýdan bastaý alǵan. Munan keiin elimizde «SaryarqaAvtoProm», «SemAZ», «KAMAZ-Injiniring», «Hyundai Trans Auto», «Daewoo Bus Kazakhstan» sekildi avtokólik qurastyrý kásiporyndary sapqa qosyldy. Osy kásiporyndar jumysynyń nátijesinde elimizde avtoónerkásip salasy paida boldy. Jyldan jylǵa jetilip, qarqyndy damyp kele jatqan Qostanai oblysy kólik shyǵarýdyń zamanaýi tetikterine kóshken. Jańa indýstriialandyrýdyń birinshi bes jyldyǵynyń qorytyndysynda avtomobil óndirisi óńdeý ónerkásibindegi eń qarqyndy damýshy sala retinde tanytty. «SaryarqaAvtoProm» zaýyty álemdik brend sanalatyn kólikterdiń 10 shaqty túrin qurastyrady.
Qainaǵan qyzý tirliktiń ortasynda dánekerleý men syrlaý tsehynyń toby júredi. Zaýyt direktory Syrym Semeibaevtyń sózinshe, zaýyt alǵashqy ashylǵanda tek daiyn bólshekter qurastyrylatyn. Qazir ónimniń otandyq úlesi artqan.
«Óndiris aýqymy da eselep ósip keledi. Byltyr 25 myń kólik qurastyrsa, biyl jeliden shyǵatyn kólik sanyn 50 myńǵa deiin jetkizý josparlanyp otyr. Óndiristiń artýy tikelei suranysqa bailanysty», - dedi Syrym Semeibaev.
Dáýlet Nysanbaev – dánekerleý tsehynyń brigadiri. Qol astynda 10 jumysker bar.
«Biz ónimniń negizgi jumysyna jaýaptymyz. Avtomashinanyń kabinasyn qurastyryp, kelesi tsehqa daiyndaimyz. Olar boiap, shanaqtaryn iledi», - deidi tseh brigadiri.
Jalpy bir avtokólikti qurastyrýǵa bir-eki táýlik ýaqyt ketedi. Máselen, bir ǵana JAC markaly avtokólik usaq torap tásilimen óndiriledi. Bul tásildiń ózi ishinen birneshe bólikke jikteledi.
«Eń áýeli kýzov bóligin ólsheimiz. Keiin esigin tańdap, mólsherin esepteimiz. Munan soń daiyn bólshekterdi dánekerleý jumystary bastalady. Usaq-túiek jumys bolyp kóringenimen, asa jaýapkershilikpen qaraýdy talap etedi. Syrlap, boiaý jaqqan soń shanaqtaryn biriktirip, iri bólshekterin jalǵaimyz. Usaq torapty ádispen kólik quraý shamamen osylai júredi. Bir táýlik ishinde 15-16 kóliktiń qorabyn daiyndaimyz», - dep túsindirdi Dáýlet Nysanbaev.
Tseh brigadiriniń zaýytta júrgenine 6 jyl. Jumysyn dánekerleýshi maman bolyp bastaǵan. Kórsetkishteri elenip, tseh basshylyǵyna deiin kóterildi. Bastapqyda ózge de jergilikti mamandarmen birge Qytaidaǵy zaýytqa baryp tájiribe jinap qaitqan. Dáýlet Nysanbaevtan Qytai sapary týraly suradyq.
«Kásibimniń negizi Qostanai oblysynda qalandy. Qalǵany tek tájiribe jinaý ǵoi. Ol jaqta ózime kerektini úirendim. Biraq jergilikti zaýyttyń daiyndaý júiesi unaidy. Jumysqa turǵan soń kásibińdi arttyryp, shyńdalýǵa múmkindik bolady. Áýeli teoriiany úirenesiń, tájiribelik jumystar birshama ýaqyttan soń beriledi. Ábden meńgerip alǵan soń kólik qurastyrýǵa kirisýge bolady. Qazir shetelden mamandar kelip, úiretip datyr ǵoi. Olar kóbine tehnologiia protsesine asa mán beredi», - dedi D.Nysanbaev jumysy týraly.
Sonymen, Qostanai oblysyndaǵy avtozaýyttyń búgingi tynysy osy. Qazir qostanailyqtar Ázerbaijan, Resei, Tájikstan, Ózbekstan elderiniń naryǵyna shyqqan. Memlekettik qoldaýdyń arqasynda búginde otandyq avtokólikterdiń eksporttyq áleýeti joǵary. Endigi meje – jyl sońyna deiin 50 myń avtokólik qurastyrý.
