Qostanai oblysynda aldaǵy demalys kúnderi qoǵamdyq kólikter júrmeidi. Bul týraly oblys ákimi Arhimed Muhambetov áleýmettik jelide jazdy, dep habarlaidy "Ult aqparat".
Arhimed Muhambetov búgin koronavirýstyq infektsiianyń taralýyna jol bermeý boiynsha jedel shtabtyń kezekti otyrysyn ótkizdi. Jiynda monitoringtik toptardyń jumysy qarastyryldy. Qazir óńirde vedomstvoaralyq komissiianyń tapsyrmasyna sáikes monitoringtik toptardyń jumysy kúsheitilgen.
«Qazirgi ýaqytta 860 reid júrgizilip, 4757 nysan tekserildi, onyń barysynda 825 zańbuzýshylyq anyqtalyp, materialdar ákimshilik sharalar qabyldaý úshin sanepidbaqylaý organdaryna joldandy.
Engizilgen shekteýlerge qaramastan, oblys turǵyndary áli de jappai otbasylyq is-sharalar ótkizýde, al biznes ókilderi sanitarlyq normalardy buzyp keledi. Sondyqtan karantin talaptaryn buzǵandardy mindetti túrde beinejazbaǵa túsirip, monitoringtik toptardyń jumysyn kúsheitýdi tapsyrdym.Azamattardy KVI taralýyna jol bermeý boiynsha barlyq usynylǵan sharalardy saqtaýǵa shaqyramyn», dep jazdy Arhimed Muhambetov Instagram paraqshasynda.
Sondai-aq, aldaǵy demalys kúnderi oblysta qosymsha shekteýler qabyldanady. Atap aitqanda, qoǵamdyq kólik jumys istemeidi jáne aýdany 2000 sharshy metrden asatyn azyq-túlik emes saýda obektileriniń jumysyna ýaqytsha tyiym salyndy. Buǵan deiin jumys istep kelgen avtomobilder men aýyl sharýashylyǵy tehnikalarynyń qosalqy bólshekterin satatyn dúkender de jumysyn toqtatady. Sondai-aq monshalar men saýnalardyń jumysy shektelip, qoǵamdyq tamaqtaný obektileri tek alyp ketý jáne jetkizý úshin jumys isteidi.
