video kadry
Orman órtinen zardap shekken Qostanai oblysyndaǵy Amanqaraǵai aýyly turǵyndaryna gýmanitarlyq kómek taratylyp jatqan sáttiń videosy jariialandy. Kýáger túsirgen kadrlarda kómek eshbir tizimsiz júk kóliginen taratylyp jatqany kórinedi, - dep habarlaidy Tengrinews.kz tilshisi.
Videoda bir-birin iterip, júk kóliginen azyq-túlik alyp jatqan adamdar toby kórinedi. Adamdar aiǵailap, qulap jatyr. Bir sátte júk kóliginde turǵandar gýmanitarlyq kómekti kópshilikke laqtyra bastaidy.
Amanqaraǵai ákimi Baitemir Ismailov aýylǵa gýmanitarlyq kómek Qazaqstannyń túkpir-túkpirinen ákelinetinin aitty. Kóp jaǵdaida kómektiń bólinýi tikelei ákimdik baqylaýynda. Biraq, ákimniń aitýynsha, gýmanitarlyq júkti ákelip, azyq-túlik pen zattardy baqylaýsyz taratatyndar da bar.
"Búkil Qazaqstanǵa gýmanitarlyq júk úshin raqmet. Bizge júk kóligi kelgende qaidan kelgenin, kimniń jaýapty ekenin, telefon nómirin, ne ákelgenin, qansha tonna ekenin jazyp alamyz. Sodan keiin tizimdi aýdan ákimdigine ótkizemiz, olar jalpy tizim jasaidy. Bul jazbany biz jasaimyz. Júk kelgenge deiin bizge aitady, mysaly, Almatydan kómek bara jatqanyn. Sosyn júk kóligi kelip, eriktiler ony qoimalarǵa túsiredi. Sosyn olar kómekti akt boiynsha bizge tapsyrady, qansha tonna, qandai zat, bárin. Solai bolýy kerek. Biz qabyldaimyz, sanap, alǵysymyzdy aityp, tamaqtandyryp, qoshtasamyz, olar ketedi. Biraq keibir júk kólikteri keledi, olar júkti túsirýdi toqtatyp, adamdarǵa tikelei tarata bastaidy. Biraq bulai isteýge bolmaidy, bári sonda júgiredi. Shyny kerek, júkti ákelgender ózderin jarnamalap jatqandai. Olar adamdardyń fonynda ózderin sýretke túsirip alady: mine, biz taratyp jatyrmyz degendei", - deidi aýyl ákimi Baitemir Ismailov.
Qazir ákimdikte gýmanitarlyq kómek alatyn muqtaj jandardyń úsh tizimi bar. Bul órtten zardap shekkender ǵana emes.
"Órtten 91 otbasy zardap shekti. Biz olardyń aty-jónin, telefondary, órtengen otbasynda qansha bala bar ekenin bilemiz. Ekinshi tizim - múlki jartylai órtengender, bul úileri aman qalǵandar, al ǵimarattar - aýlasy, monshalary órtenip ketken. Olardyń 70-i bar. Al úshinshi tizim - az qamtylǵan, kópbalaly otbasylar, múgedekter, jalǵyz basty zeinetkerler jáne t.b. - 169 adam. Mine, úsh tizim. Biz az qamtylǵandarǵa bir rettik aktsiia jasap jatyrmyz, olar bizge keldi - olarǵa da kómek kórsettik. Al órtten zardap shekkenderge úi salyp bergenshe 3 ai boiy azyq-túlikpen qamtamasyz etýimiz kerek. Túsinesiz be?", - deidi Amanqaraǵai ákimi.
Baitemir Ismailov eriktiler men gýmanitarlyq júk ákeletinderdi halyq arasynda dúrbeleń týdyrmai, ortalyqtandyrylǵan áreketke shaqyrady.
"Bizde azyq-túlik jetkilikti. Tońazytqyshta et, qoimada azyq-túlik bar. Bizge qurylys materialdary qajet: profil qańyltyr, shegeler, balǵalar, taqtalar. Úileri aman qalǵandardyń qosalqy qurylystary, qorshaýlary órtenip ketti, olardy qalpyna keltirý kerek".
