Jangeldi aýdanynda bolǵan jol-kólik oqiǵalary saldarynan Torǵai aýylynyń jergilikti úsh turǵyny, al B.Mailin aýdanynda 23 jastaǵy er adam qaza tapty, dep habarlaidy QazAqparat Qostanai oblystyq politsiia departamentiniń baspasóz qyzmetine silteme jasap.
«9 qarasha kúngi saǵat 15:00 shamasynda «Arqalyq-Torǵai» kúre jolynyń 59-shy shaqyrymynda, Taýysh aýylynyń janynda «AUDI-80» kóligin júrgizip kele jatqan 52 jastaǵy er adam kóligin basqara almai, kiývetke aýdaryldy. Apat saldarynan kóliktiń júrgizýshisi, 50 jáne 56 jastaǵy jolaýshylar, Torǵai aýylynyń turǵyndary alǵan jaraqattardan oqiǵa ornynda kóz jumdy. Arnai sot-meditsinalyq saraptama taǵaiyndaldy. Jaraqat alǵan jeti jasar qyz bala ortalyu aýdandyu aýrýhanaǵa jetkizildi», - dep atap ótti vedomstvodan.
Sol kúngi saǵat 17 shamasynda «Qostanai-Qarabutaq» kúre jolynyń 102-shi shaqyrymynda, Tobyl kentinen 8 shaqyrym jerde taǵy bir jol-kólik oqiǵasy oryn alǵan.
«VAZ-2112 kóligin júrgizip kele jatqan 23 jastaǵy er adam kiývetke aýdaryldy. Jol apaty saldarynan júrgizýshi kúrdeli jaraqattar alyp, Lisakov qalalyq aýrýhanasynyń jansaqtaý bóliminde qaitys boldy. 17 jáne 28 jastaǵy jolaýshylar aýrýhanaǵa jetkizildi», - dep túsindirdi politsiianyń baspasóz qyzmetinen.
Atalǵan faktiler boiynsha sot aldyndaǵy tergep-tekserý amaldary júrgizilýde.
