Qostanai oblysynda dini nysandardyń qyzmeti ýaqytsha toqtatyldy. Bul týraly búgin Úkimet otyrysynda Qostanai oblysynyń ákimi Arhimed Muhambetov aitty, dep habarlaidy "Ult aqparat".
«Jyl basynan beri 8 672 koronavirýs tirkeldi. Qazirgi ýaqytta 1096 statsionarlyq tósek-oryn ornalastyrylǵan. Júktemesi 39,5 paiyzdy quraidy. Qajet bolǵan jaǵdaida tósek-oryn sanyn 3 myńǵa deiin arttyrýǵa daiynbyz. Osy jyldyń 18 qańtarynan bastap syrqattanýshylyqtyń ósýine bailanysty karantin talaptary 2 apta merzimge qatańdatyldy. Máselen, oblystyń bas sanitar dárigeriniń qaýlysyna sáikes, birqatar ózgeris engizildi. Dini nysandardyń qyzmeti ýaqytsha toqtatyldy. Qoǵamdyq tamaqtandyrý nysandary jáne Halyqqa qyzmet kórsetý ortalyqtarynyń jumysy ýaqyty boiynsha shekteldi», - dedi ol.
Onyń aitýynsha, senbi jáne jeksendi kúnderi aýdany 2 myńnan asatyn azyq-túlik emes saýda nysandary men jabyq azyq-túlik jáne azyq-túlik emes bazarlardyń, SPA ortalyqtardyń, sport nysandarynyń qyzmeti, sonymen qatar qoǵamdyq kólik qozǵalysy ýaqytsha toqtatyldy.
«Karantin talaptarynyń saqtalýyn baqylaý maqsatynda mobildik toptar jyl basynan beri 942 reid júrgizdi. 2 823 nysan tekserildi. 26 zańbuzýshylyq anyqtaldy. Atalǵan faktiler boiynsha 29 mln 200 myń teńgege 26 ákimshilik aiyppul salyndy. Dárilik zattarmen qamtamasyz etý maqsatynda turaqtandyrý qory 538 mln teńgege ulǵaityldy. Qazirgi ýaqytta koronavirýsqa qarsy jappai vaktsinalaýǵa daiyndyq júrip jatyr. 71 birlik meditsinalyq maqsattaǵy muzdatqysh, kameralar satyp alý boiynsha konkýrstyq rásimder aiaqtaldy. Birinshi toptamany jetkizý osy jylydń 10 aqpanynan bastalady», - dedi Arhimed Muhambetov oblysta dári-dármektiń 2 aiǵa jetetin qory bar ekendigin basa aitty.
