Qostanai oblysyndaǵy úilerdiń birinde 6 ailyq bala úshinshi qabattaǵy terezeden qulap tústi. Onyń ómirin úidiń ekinshi qabatynda ornatylǵan kúnqaǵar saqtap qaldy, dep habarlaidy "Ult aqparat".
Qostanai oblystyq TJD-nyń málimdetinshe, oqys oqiǵa 17 sáýir kún Qostanai qalasyndaǵy B.Mailin kóshesindegi 18-úide bolǵan.
«Keshki saǵat 17:00-de alty ailyq balanyń úshinshi qabattan ekinshi qabatta ornatylǵan kúnqaǵarǵa qulap túskeni týraly habarlama kelip túsken. Oqiǵa ornyna dereý TJD men jedel járdem qyzmetkerleri jiberildi», - dedi TJD ókili.
Qutqarýshylardyń málimetinshe, olar kelgenshe ata-anasy sábidi jerge alyp túsken. Bala zardap shekken joq, meditsinalyq kómekti qajet etken joq.
«Abyroi bolǵanda, bári jaqsy aiaqtalǵan. Biraq osyndai qaýipti jaǵdai ata-analardyń salǵyrttyǵynan bolatynyn atap ótý kerek. Qurmetti ata-analar, eger úide bala bolsa, terezeni ashyq qaldyrmańyzdar, balany terezeniń aldyna turǵyzbaý qajet. Bala shyǵyp ketpeý úshin terezege jaqyn jihazdy da alyp tastaý kerek. Balalardy qaraýsyz qaldyrmańyzdar!», - dep eskertedi qutqarýshylar.
