Foto: © Sputnik / Timýr Batyrshin
Qostanai qalasynyń prokýratýrasy bilim bólimimen birlesip, mektepterdegi qaýipsizdik deńgeiin tekserdi.
Alaida tekseris nátijesi kóńil kónshitpei otyr. Prokýratýra ókilderi barǵan barlyq mektepte – 16, 14, 19, №1 jáne №2 litseileri, Gorkii jáne Máýlenov atyndaǵy gimnaziialarda zańbuzýshylyq anyqtalǵan, dep habarlaidy Sputnik Qazaqstan saity "Alaý" portalyna silteme jasap.
Qostanai qalalyq prokýratýrasynyń aǵa prokýrory Elmira Nurqanovanyń aitýynsha, olar mektepterge granatanyń mýliajymen kirip kórgen. Anyqtalǵandai, kúzetshiler kireberiste eshkimdi teksermeidi.
"Meniń sómkemde granatanyń mýliajy jatqan, meni esh kedergisiz kirgizdi. Al áriptesim, tipti, qolyndaǵy "granatamen" ishke kirip ketti. Mektep ǵimaratyna typ-tynysh ótken", - deidi Nurqanova.
Erejege sáikes, kúzetshi mektepke kiretin bóten adamdardy metall izdegishtiń kómegimen tekserýi kerek. Eger ol dybys shyǵarsa, sómkesin ashyp kórsetýdi suraýǵa quqyly. Alaida Qostanaidaǵy mektepterde mundai tekseris júrgizilmeidi.
Sondai-aq prokýratýra qyzmetkerleri evakýatsiialyq esikterdi de teksergen. №19 mektep pen Gorkii atyndaǵy gimnaziiada olar jabyq turǵan.
Tekseris barysynda pýlttik kúzet te óz fýnktsiiasyn oryndamaityny anyqtaldy.
"Kelisimshart negizinde qyzmet kórsetetin pýlttik kúzet mektepke 5-10 minýtta jetýge mindetti. Alaida is júzinde olar keshigip keledi. Máselen, №14 mektepke pýlttik kúzettiń qyzmetkerleri dabyl túimesin basqannan keiin 27 minýttan soń bir-aq jetken", - deidi Elmira Nurqanova.
Tekseris nátijesi boiynsha prokýratýra bilim bólimine zańbuzýshylyqtardy joiý boiynsha uiǵarym jiberedi. Bilim bólimi problemalar baryn joqqa shyǵarǵan joq. Mamandandyrylǵan kúzet qyzmetteri endi iske kiriskendikten, jumys pysyqtalyp jatyr, deidi olar. Mysaly, kúzetshiler úshin jas shekteýi engizilgen. Endi 50 jasqa deiingi adamdar ǵana mektepke kúzetshi bolyp ornalasa alady.
Prokýrorlar basqa bilim oshaqtaryn da tekserýdi josparlap otyr. Sonymen qatar tekserip ótken mektepterge qaita baryp, olqylyqtardy joiyp-joimaǵanyn anyqtaidy.
