Qostanai oblysynyń arhivine Tatarstannan qundy qujattar ákelindi. Sonymen qatar arhiv qoryn kóbeitý maqsatynda arnaiy jobalar qolǵa alyndy. Bul týraly Óńirlik kommýnikatsiialar qyzmetiniń alańynda Aaqparattandyrý, memlekettik qyzmetter kórsetý jáne arhivter basqarmasynyń basshysy Azamat Kashiev baiandady, dep habarlaidy QazAqparat.
Azamat Kashiev «Arhiv-2025» jobasyn iske asyrý jónindegi keshendi josparlarymen bólisti. Onyń aitýynsha, byltyr arhiv salasyn qarjylandyrýǵa aitarlyqtai mán berilip, 610,7 mln teńge qarastyryldy.
«Onyń ishinde jergilikti biýdjetten qosymsha 107 mln teńgeden astam qarajat bólindi. 40 kompiýter, A3 formatyndaǵy planshetti skanerlerdiń 17 danasy, 40 kúlgin-shamdy skaner satyp alyndy. Memlekettik arhivter qory 392 qujat, 652 foto, 9 aýdio, 50 videomen tolyqtyryldy. Sondai-aq Tatarstan Respýblikasynyń arhivterindegi Qazaqstanǵa, jalpy Qostanai óńiriniń tarihyna qatysty qujattar ákelindi», - deidi basqarma basshysy.
Búginde Qostanai oblysynyń memlekettik arhivinde HV-HIH ǵasyrlar aralyǵyndaǵy óńirdiń saiasi, áleýmettik jáne ekonomikalyq tarihy týraly derekter óte az. Sondyqtan arhiv qyzmetkerleri Resei Federatsiiasynyń Cheliabi, Orynbor, Troitsk qalalary men Tatarstan Respýblikasyndaǵy áriptesterimen yntymaqtastyq ornatyp, ózara iskerlik qarym-qatynasty damytýda.
Sońǵy 2 jylda oblystyq arhivke Qostanai tarihyna qatysty birtalai qujat ákelindi. Onyń ishinde 1919 jylǵy Qostanai militsiia bólimshesiniń, 1919 jylǵy Qostanai qalalyq partiia komitetiniń hattamalary, Qostanai oblysy aýdandarynyń shekaralaryn anyqtaýǵa qatysty qujattar, aýdandyq jáne qalalyq uiymdardyń qyzmeti, shirkeý jazbalary siiaqty qundy qujattar bar.
Aqparattandyrý, memlekettik qyzmetter kórsetý jáne arhivter basqarmasynyń bólim basshysy Saltanat Nurtasqyzynyń sózine qaraǵanda, Tatarstannan 1700 bettik qujattar ákelindi. Onyń ishinde Qazan ýniversitetiniń kitaphanasyndaǵy sirek qoljazbalar men kitaptar qorynan II Ekaterina patshaiymnyń 1789 jyly qyrǵyz-qaisaq ordasynyń bodandyqqa adaldyǵy úshin bergen alǵysy bar. Budan bólek, II Ekaterina patshaiymnyń 1771 jyly 17 qańtarda Nuraly hanǵa qalmaqtardyń narazylyq bas kóterýine jol bermeý týraly jazǵan hat-habarlamasy, 1829 jyldyń 29 mamyrynda Orynbor general-gýbernatorynyń Jantóre Jáńgirov sultanǵa alǵys haty tabyldy. Qazan muraǵattarynan qazaq halqynan shyqqan alǵashqy dáriger Muhamedjan Qarabaev pen uly aǵartýshy Ybyrai Altynsaringe qatysty tyń qujattar anyqtaldy. Arhivshiler Altynsarin men Ilminskiidiń ózara jazysqan hattarynyń tolyq kóshirmesin alyp, oblystyq arhiv qoryn tolyqtyrdy. Qazir bul qujattar tsifrlyq júiege kóshirilip jatyr, olar kópshilikke qoljetimdi bolmaq. Arhivter basqarmasy «Tsifrlyq Qazaqstan» memlekettik baǵdarlamasyn iske asyrý sheńberinde 21 memlekettik arhiv pen oblystyń 294 mekemesinde «Qujattardyń biryńǵai elektrondyq arhivi» júiesin engizdi.
