Foto: Úkimettiń baspasóz qyzmeti
Premer-ministr Oljas Bektenov jumys saparymen Qosshyǵa baryp, qalany damytýdyń bas josparymen tanysty, dep habarlaidy úkimettiń baspasóz qyzmeti.
Qazirgi kezde Qosshyda resmi túrde 59 myńǵa jýyq adam turady. Biraq turǵyndardyń naqty sany 100 myńnan asady. Al injenerlik jeliler 30 myń turǵynǵa eseptelgen. Boljamǵa sáikes, 2038 jylǵa qarai halyq sany 150 myńǵa deiin ósedi.
Jańa bas josparda kóppáterli turǵyn úilerdiń qurylysyna 360 gektardan astam, jeke turǵyn úi qurylysyna 900 gektardan astam jer telimi bólingen. Sondai-aq 2038 jylǵa deiin 31 balabaqsha, 16 jalpy orta mektep, oblystyq aýrýhana jáne 7 emhana salý josparlanyp otyr. Al qalanyń soltústik-batys bóliginde jańa jumys oryndaryn qurý úshin jalpy aýdany 264 ga indýstriialyq aimaq ashý kózdelgen. Elordaǵa aparatyn jol da salynady.
Budan bólek, ákimshilik ǵimarattar, ortalyq stadion, muz saraiy, dene shynyqtyrý-saýyqtyrý keshenderi, mádeniet úileri, jańa neke saraiy, oqýshylar saraiy, teatr, balalar men jasóspirimder sport mektebin salý úshin aýmaqtar qarastyrylǵan.
Aita keteri, 2021 jyly Qosshyǵa qala mártebesi berilgen bolatyn.
