Qosshyda bolǵan uzyn-sonar kepteliske qatysty Tselinograd ákimdigi túsinikteme berdi, dep habarlaidy "Ult aqparat".
«Qosshy aýylyna kire beriste Respýblika kóshesinen buryla bergen tusta turǵan baǵdarsham istemei qalǵan. Ol baǵdarshamǵa Nur-Sultan qalalyq qyzmeti(...) jaýapty. Biz «I-Komek» qyzmetine qońyraý shalyp, baǵdarshamdy jóndeý kerektigi týraly ótinish qaldyrdyq. Olar bizge qaitadan habarlasyp, máseleniń sheshilgenin habardar etti. Bilýimshe, fakt boiynsha istiń qosymsha mán-jaiy anyqtalyp jatyr», - dedi Aqmola oblysy Tselinograd aýdany jolaýshylar tasymaly jáne avtokólik joldary bóliminiń basshysy Arman Jumaǵulov QazAqparat tilshisine.
Onyń aitýynsha, qazirgi kezde jaǵdai rettelýde.
«Ol jerde tańerteń jol-kólik oqiǵasy bolǵan. Alaida ol joldy jaýyp tastaityndai aýqymdaǵy kólik apaty emes. Ol kólikter jol shetinde turǵan. Dál qazirgi ýaqytta baǵdarshamnyń túsin retteý jumysy júrgizilip jatyr. Jýyq arada qosymsha taǵy habarlaimyz», - deidi A.Jumaǵulov.
Aita ketsek, buǵan deiin Qosshy aýylyna kireberistegi baǵdarshamnyń istemei qalǵany jáne uzyn-sonar kólik keptelisi týraly áleýmettik jelide jazylǵan edi.
