Aqmola oblysy aýmaǵyndaǵy «Lesnaia poliana» aialdamasynda qoǵamdyq kólik júrgizýshisi 17 jastaǵy múgedek stýdentti aiazdy kúni avtobýstan túsirip tastaǵan, dep habarlaidy "Ult aqparat".
«Keshe tańerteńgi saǵat 7.30-da ekinshi toptyń múgedegi – 17 jastaǵy jienimdi «Lesnaia Poliana» aialdamasynda №303 avtobýs júrgizýshisi «jol júrý biletiń jaramsyz» dep joldan túsirip jibergen. Kóshedegi 25 gradýstyq aiazda jienim kolledjdegi sabaǵyna keshigip qalǵan. Qaltasynda nebary 105 teńge bolatyn. Bul jerde qandai problema bar? Park basshylyǵy jyl saiyn zeinetkerler men múgedekterge memleket belgilegen jeńildikterdiń kúshin joiady. Qossha aýyly qala aýmaǵynan 500 metr ǵana qashyqtyqta ornalasqan. Mundai aiazda adamdy qalai túsirip ketýge bolady? Nelikten Qosshy turǵyndary úshin mundai erejeler engizilgen? Nege qaladaǵy zeinetkerler jol júrý biletterimen júrip kele jatyp, jol ortasynda zeinetker sanatynan shyǵyp qalady. Bári qalada jumys isteidi, qalada aqsha qalady, salyqtar tólenedi», - dep jazdy Jámilá Eleýsizova atty turǵyn facebook paraqshasynda.
Bul máselege qatysty «Astana LRT» JShS basqarma tóraǵasy Bekmyrza Igenberdinov áleýmettik jelide jaýap berdi.
«Qala mańyndaǵy baǵdarda kórý qabileti tómen, kámeletke tolmaǵan kolledj stýdentin tastap ketken oqiǵany túsindirgim keledi. Kelisemin, júrgizýshi kámeletke tolmaǵan jolaýshyny tastap ketip, durys istemedi. Sebebi, «aiazdy kúnderi jolaýshylardy tastamańyzdar» degen naqty nusqaý bolǵan. Mán-jai anyqtalý ústinde. Alaida ishki tergeý júrgizý úshin bizge avtobýs pen júrgizýshi týraly naqty aqparat qajet. Jolaýshyny tastap ketken júrgizýshini anyqtap, oǵan qatysty tiisti sharalar qoldaný kerek», - deidi Bekmyrza Igenberdinov.
Kompaniia basshysy avtobýs júrgizýshi jolaýshynyń jasyn jáne kórý qabiletiniń nashar ekenin baiqamaǵan bolýy kerek dep tuspaldaidy. Aryzdanýshynyń aitýynsha, onyń jieniniń bir kózi múlde kórmeidi.
«Múmkin júrgizýshi ony aqshasy jetpei qalǵan jolaýshy dep qana oilaǵan shyǵar. Sonymen birge, men jeńildetilgen sanattaǵy azamattar úshin qoǵamdyq kólikterde júrý aqysynan bosatý túrindegi áleýmettik qoldaý kórsetý tártibin túsindirgim keledi. Birinshiden, jeńildetilgen «Aimaq» kólik kartalaryn paidalanýshylar 2019 jyldyń 31 jeltoqsanyna deiin qala mańyndaǵy baǵdarlarda tegin jol júrý múmkindigine ie. Iaǵni, azamattardyń jeńildikke ie sanatyna jatatyn Tselinograd jáne Arshaly aýdandarynyń turǵyndary qala mańyndaǵy marshrýttarda tegin júrýge quqyly. Nur-Sultan qalasy máslihatynyń 2017 jylǵy 20 shildedegi № 167/21-VI sheshimimen elordanyń jekelegen sanattaryna jatatyn qala jolaýshylaryna jol júrý aqysyn tóleýden bosatý túrindegi áleýmettik kómek kórsetiledi. Osy qujattaǵy erejeler qala mańyndaǵy marshrýttarǵa qoldanylmaidy. Joǵaryda aitylǵandardy qorytyndylai kele Nur-Sultanda tirkelgen jeńildetilgen kólik kartalaryn paidalanýshylar tek qalalyq jáne ekspress marshrýttar boiynsha tegin qatynaýǵa, «Aimaq» jeńildik kartalaryn paidalanýshylar - tek qala mańyndaǵy marshrýttarda ǵana júrýge quqyly ekenin habarlaimyn», - deidi ol.
