Astanada Qazaqstandaǵy Konrad Adenaýer qory ókildigi kóshi-qondaǵy jańa úrdister máselelerin talqylady, dep habarlaidy QazAqparat.
«Germaniiada migratsiiadan ózge másele joqtai kórinedi. Shynynda da, kóshi-qon máselesi óte ózekti taqyrypqa ainaldy. Meniń oiymsha, jaqyn arada kóshi-qon salasyndaǵy úrdisterdiń aýqymy keńeiedi. Sebebi, ekonomikalyq, áskeri jáne ózge de sebeptermen álemniń kóptegen elderinen halyq údere kóship jatyr. Rohindja sekildi aimaqtardyń turǵyndary kóshýge májbúr. Odan bólek, ádettegi eńbek migratsiiasy bar», - dedi Tomas Helm L. N. Gýmilev atyndaǵy Eýraziia ulttyq ýniversitetinde ótken «Migratsiia: jańa úrdister men baǵyttar» dóńgelek ústelinde.
Onyń pikirinshe, kóshi-qon máselesi qaryshtap damyp kele jatqan Qazaqstandy da ainalyp ótpeidi.
«Kóshi-qon máselesi 8 mld-qa jýyq adam turatyn Jer sharyndaǵy árbir damyǵan memleketke áser etpek. Kúnnen-kúnge damyp kele jatqan Qazaqstan da keleshekte ekonomikalyq jetistikterge jetken saiyn migranttar máselesine jii tap bolady», - dedi Qor ókili.
Sonymen birge, T. Helm kóshi-qon máselesine kóz jumyp qarap otyrmaý qajettigin eske saldy.
«Migratsiiaǵa qatysty kóptegen máseleler tyǵyz bailanysty. Áitse de, migratsiianyń berer múmkindikteri de kóp. Máseleni durys sheshý joldaryn birlesip talqylaýymyz qajet. Munda tarihymyzǵa qatysty málimdeme jasaǵym keledi. Migranttarǵa qarsy qorǵan turǵyzý - máseleni túbegeili sheshpeidi. Biz de óz tarihymyzda qabyrǵa turǵyzyp kórgenbiz, onyń burys sheshim ekenin tarih kórsetti», - dedi Tomas Helm.
Ókildik direktory áleýmettanýshy stýdentter men ǵalymdardy erteń Astanada ótetin iri konferentsiiaǵa shaqyrdy.
«Kóshi-qon máselesi boiynsha erteń Nazarbaev Ýniversitetinde konferentsiia ótedi. Sharany Qazaqstan halqy Assambleiasymen birlesip uiymdastyryp otyrmyz. Migratsiia men integratsiia taqyryby boiynsha Qazaqstan men Germaniia teń dárejede pikir almasa alady», - dedi ol.
Dóńgelek ústel barysynda germaniialyq Bilefeld ýniversitetiniń professory Tomas Faist Germaniiaǵa kóship barǵan migranttardy qoǵamǵa beiimdeý týraly baiandama oqydy.
