Memlekettik hatshy Qyrymbek Kósherbaev pen Premer-Ministrdiń orynbasary Eraly Toǵjanov elordadaǵy Abai Qunanbaiulynyń eskertkishine gúl qoiyp, ziialy qaýymmen birge aqynnyń rýhyna taǵzym etti, dep habarlaidy QazAqparat.
Saltanatty sharaǵa Prezident Ákimshiligi basshysynyń birinshi orynbasary Dáýren Abaev, Bilim jáne ǵylym ministri Ashat Aimaǵambetov, Mádeniet jáne sport ministri Aqtoty Raiymqulova, Nur-Sultan qalasynyń ákimi Altai Kólginov bastaǵan memlekettik organ ókilderi elimizdiń ár óńirinen jinalǵan aqyn-jazýshylar qatysty.
Gúl qoiý rásiminen keiin Memlekettik hatshy Qyrymbek Kósherbaev bul aitýly kúnniń qazaq rýaniiatyndaǵy orny týraly pikir bildirdi.
«Búgin Qazaqstan halqy úshin erekshe kún. Óitkeni bul kúni uly Abaiǵa taǵzym etemiz, uly Abaidan ózimizdiń jasampaz isterimizge rýhani qoldaý tabamyz.
«Birińdi qazaq biriń dos Kórmeseń, istiń bári bos», - dep ketken uly Abaidyń osy ósietin oryndaý – bizdiń paryzymyz. Bardy baǵalap, joqty saralap, táýbemizden jańylmai, táýekelden ainymai, táýelsizdik tasyn órge súiregen halqymyzdyń jasampaz eńbegine kezinde Abai bizge úlken rýhani tirek bolyp otyr. Sondyqtan biz táńirge Abai qasymyzda emes dep ókpe aita almaimyz. Biz Alla taǵalaǵa qazaq halqyna osyndai uly Abaidy syilaǵan úshin rahmet aitamyz», - dedi Qyrymbek Kósherbaev.
