QR Prezidenti janyndaǵy Sybailas jemqorlyqqa qarsy is-qimyl máseleleri jónindegi komissiianyń otyrysy ótti, dep habarlaidy Aqorda.
Búgin Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen Qazaqstan Respýblikasy Prezidenti janyndaǵy Sybailas jemqorlyqqa qarsy is-qimyl máseleleri jónindegi komissiianyń otyrysy ótti.
Otyrysta Óńirlerdi damytýdyń 2020 jylǵa deiingi memlekettik baǵdarlamasyn iske asyrýǵa bólingen qarjynyń tiimdi paidalaný máselesi talqylandy.
Ulttyq ekonomika ministrliginiń, Respýblikalyq biýdjettiń atqarylýyn baqylaý jónindegi esep komitetiniń, Bas Prokýratýranyń, Sybailas jemqorlyqqa qarsy is-qimyl agenttiginiń jáne birqatar óńir ákimderiniń baiandamalary tyńdaldy.
Óńirlerde Memlekettik baǵdarlamany júzege asyrý barysynda turǵyn úi-kommýnaldyq sharýashylyǵy jáne aýyz sýmen qamtamasyz etý salalarynda sybailas jemqorlyqqa qatysty joǵary táýekelder bar ekeni anyqtaldy.
Atap aitqanda, prokýratýra organdary elimizdiń alty óńiri boiynsha qarjy jymqyrý jáne maqsatsyz jumsaý faktileri boiynsha jalpy somasy 5,3 mlrd teńgeni quraityn memlekettik qarajattyń ysyrap bolǵanyn anyqtaǵan, odan memleketke 730 mln teńge kóleminde zardap kelgen. Osy faktiler boiynsha 7 sotqa deiingi tergeý jumystary bastalyp, 267 mln teńge qaitarylǵan.
Sybailas jemqorlyqqa qarsy is-qimyl agenttigi 2017 jyldan bastap sybailas jemqorlyq boiynsha 145 qylmysty anyqtady, qylmys jasaǵany úshin 78 adam qylmystyq jaýapkershilikke tartylyp, 59-y sottaldy. Memleketke keltirgen 931,9 mln teńge zardap somasynyń 907,6 mln teńgesi qaitaryldy.
Baǵdarlamany iske asyrý kezeńi boiynsha Qarjy ministrligine qarasty Qarjy monitoringi komiteti Ekonomikalyq tergeý qyzmetiniń óndirisinde 33 qylmystyq is qaralǵan.
Qarjy ministrliginiń Ishki memlekettik aýdit komiteti 10 laýazymdy tulǵany quqyq buzýshylyq boiynsha ákimshilik jaýapkershilikke, 22 tulǵany tártiptik jaýapkershilikke tartty. Protsesstik sheshim qabyldaý maqsatynda quqyq qorǵaý organdaryna jalpy somasy 5,7 mlrd teńgeni quraityn 24 is jiberildi.
2019 jyly kameralyq baqylaý jalpy somasy 42,8 mlrd teńgeni quraityn memlekettik satyp alýdyń 45 protsedýrasyn qamtyp, jalpy somasy 39,1 mlrd teńgeni quraityn 42 protsedýra boiynsha memlekettik satyp alý zańdylyǵyn buzý jaǵdailary anyqtalǵan.
Komissiia otyrysynyń qorytyndysy boiynsha Memlekettik hatshy quqyq buzýshylyqqa jol bergen sebepterdi joiýǵa jáne olardyń aldyn alýǵa baǵyttalǵan naqty sharalardy qabyldaýdy tapsyrdy. Memleketke tigizgen zardapty óteý máselesine de erekshe nazar aýdardy.
Sonymen qatar Komissiia Memlekettik baǵdarlamany ary qarai iske asyrý úshin jáne Memleket basshysynyń tapsyrmalaryn oryndaý barysynda sybailas jemqorlyq kórinisteriniń aldyn alýǵa baǵyttalǵan naqty usynystar daiyndap, tiisti memlekettik organdarǵa jiberdi.
