Qyrymbek Kósherbaev Shetelde kadrlar daiarlaý jónindegi respýblikalyq komissiianyń otyrysyn ótkizdi, dep habarlaidy Aqorda.
Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen Shetelde kadrlar daiarlaý jónindegi respýblikalyq komissiianyń kezekti otyrysy ótti.
Memlekettik hatshy atap ótkendei, «Bolashaq» baǵdarlamasy – bul táýelsiz Qazaqstannyń adami kapitaldy damytýǵa jáne ulttyń básekege qabilettiligin arttyrýǵa baǵyttalǵan serpindi jobasy. Shetelde oqý jáne taǵylymdamalardan ótýdiń arqasynda 11 myńnan astam qazaqstandyq ózderiniń kásibi bilimi men biliktiligin arttyrýǵa múmkindik aldy. Pandemiianyń saldarynan týyndaǵan qiyndyqtarǵa qaramastan, biz álemdegi eń myqty ýniversitetterde, ǵylymi ortalyqtarda qyzmetkerler men mamandardy oqytýdy jalǵastyra beremiz.
Komissiia sheshimimen «Bolashaq» halyqaralyq stipendiiasy magistratýra men doktorantýrada oqityn, sondai-aq, álemniń jetekshi ǵylymi jáne óndiristik ortalyqtaryna taǵylymdamadan ótýge jiberiletin 113 úmitkerge berildi.
Komissiia otyrysynda «Bolashaq» baǵdarlamasy sheńberinde taǵylymdamadan ótý úshin jańa sanat bekitildi. Soǵan sáikes endi mádeniet jáne sport salasynyń qyzmetkerleri de atalǵan baǵdarlama boiynsha bilim ala alady.
Qazirgi ýaqytta 612 stipendiat «Bolashaq» baǵdarlamasy sheńberinde bilim alýda. Onyń 551-i álemniń 19 elinde oqyp jatsa, 61-i Qazaqstan aýmaǵynda júrip, qashyqtan bilim alýda.
Sonymen qatar, 421 stipendiat akademiialyq oqýǵa, taǵylymdamadan ótýge joldama kútip otyr.
Otyrys qorytyndysy boiynsha Memlekettik hatshy «Bolashaq» halyqaralyq stipendiiasyn odan ári iske asyrý, onyń ishinde, úmitkerlerdi irikteý qaǵidalaryn jetildirý, otandyq ǵalymdardyń jetekshi ǵylymi-zertteý institýttar men ǵylymi uiymdarda taǵylymdamadan ótýin uiymdastyrý jóninde birqatar tapsyrma berdi.
