Almaty qalasyndaǵy «Dostyq úiinde» «Jahandaǵy zamanaýi qazaqstandyq mádeniet» jobasy aiasynda BUU-nyń 6 tiline aýdarylǵan qazaq ádebieti antologiialarynyń tanystyrylymy ótti, dep habarlaidy "Ult aqparat" Aqordaǵa silteme jasap.
Bul joba Qazaqstan Respýblikasynyń Tuńǵysh Prezidenti – Elbasy N.Á.Nazarbaevtyń bastamasymen júzege asyrylyp jatqan «Rýhani jańǵyrý» baǵdarlamasy baǵyttarynyń biri. Onyń negizgi maqsaty – táýelsizdik jyldaryndaǵy qazaq ádebieti men mádenietin, mýzykasy men beineleý ónerin, horeografiia, kino jáne teatr salasyndaǵy jetistikterin álemge tanytý.
Jiynǵa shyǵarmalary álem tilderine aýdarylǵan avtorlar men aýdarmashylar, QR Memlekettik hatshysy, «Rýhani jańǵyrý» baǵdarlamasyn iske asyrý jónindegi Ulttyq komissiianyń tóraǵasy Qyrymbek Kósherbaev, Almaty qalasynyń ákimi Baqytjan Saǵyntaev, QR Mádeniet jáne sport ministri Aqtoty Raiymqulova qatysty.
Basqosýda aýdarma jumysy qorytyndylanyp, avtorlarǵa alty tilde jaryq kórgen shyǵarmalarynyń jinaqtary tapsyryldy.
QR Memlekettik hatshysy Qyrymbek Kósherbaev qazaq ádebietiniń úzdik úlgilerin BUU-nyń 6 tiline aýdarý jáne ony osyndai keń kólemde taratý bizdiń tarihymyzda buryn-sońdy bolmaǵanyn aitty. «Bul jobany uiymdastyrý jáne úilestirý júiesi de burynǵydan ózgeshe boldy. Ondaǵy basty maqsat kórkem aýdarmanyń joǵary sapasyn qamtamasyz etý edi. Osy rette, eń aldymen, jobany júzege asyrýǵa 6 eldiń kórkem aýdarma salasynda tájiribesi mol, bedeldi degen baspalary tańdaldy. 60 avtordyń úzdik týyndylary engen antologiialar dúniejúziniń 5 qurlyǵyndaǵy 93 memlekettiń iri kitaphanalaryna, irgeli oqý oryndaryna, mádeniet pen ádebietke mamandanǵan ǵylymi ortalyqtaryna taratylady», – dedi Qyrymbek Eleýuly.
Qazaq ádebieti jinaqtarynyń aǵylshyn tilindegi nusqasyn Kembridj ýniversitetiniń baspasy, arab tilindegi basylymyn Mysyrdyń Ulttyq bilim jáne mádeniet ortalyǵy, ispan tilindegi jinaqtardy Servantes institýty, orys tilindegi antologiialardy M.Lomonosov atyndaǵy Máskeý memlekettik ýniversitetiniń baspa úii, qytai tilindegi jinaqtardy Beijińdegi ulttar baspasy, frantsýz tilindegi basylymdy Parijdiń mádeni birlestigi daiyndady. Atalǵan seriktes-uiymdardyń aýdarý, basyp shyǵarý, taratý-nasihattaý jumystaryna 300-ge jýyq maman jumyldyrdy.
Joba aiasynda aýdarmanyń ereksheligin talqylap, ózara áńgimelesý úshin sheteldik aýdarmashylar men baspagerlerdiń qazaqstandyq avtorlarmen kezdesýi ótkizildi. Bul aýdarmany túpnusqa mátinge meilinshe jaqyndatýǵa ári onyń kórkemdik sapasyn qamtamasyz etýge múmkindik berildi.
Ár antologiianyń taralymy – 10 myń dana. Jalpy sany 120 myń jinaq álemniń 23 myńnan astam iri kitaphanasyna, oqý oryndary men ǵylymi ortalyqtarǵa jetkizildi. Onyń ishinde aǵylshyn tildi basylymdar aǵylshyn tili resmi mártebege ie 18 memleketke, arab tilindegi jinaqtar osy tilde sóileitin Taiaý Shyǵys pen Afrikadaǵy 22 memleketke, ispan tilindegi basylymdar Ispaniiamen qatar Latyn Amerikasynyń 20 eline, Qytai tilindegi basylymdar 1,5 milliard halqy bar eldiń barlyq aimaqtaryna, orys tilindegi jinaqtar orys tilin biletin 14 memleketke, frantsýz tilindegi taralym Eýropa men Afrikanyń 17 eline taratyldy.
Sondai-aq, qazaq ádebietiniń antologiialary iri kitaphana qorlary men ondaǵy erekshe kitaptardy esepke alatyn WorldCat dep atalatyn halyqaralyq bibliografiialyq júiege endi. Antologiialardy alǵan elder men uiymdardan 100-den asa alǵys hat keldi. Máselen, Frantsiia Prezidenti Emmanýel Makron, Ulybritaniia bilim ministri Gevin Ýiliamson alǵys hatyn joldady.
Joba QR Mádeniet jáne sport ministrliginiń tapsyrysy boiynsha «Ulttyq aýdarma biýrosy» qoǵamdyq qorynyń úilestirýimen júzege asyryldy.
