Memlekettik hatshy Qyrymbek Kósherbaev Táýelsizdik merekesi qarsańynda Atyraý oblysynyń birqatar azamatyna memlekettik nagradalardy tabystady, dep habarlaidy QazAqparat.
Prezident tapsyrmasymen Atyraý oblysyna kelgen Memlekettik hatshy Qyrymbek Kósherbaev Táýelsizdiktiń 30 jyldyǵyna arnalǵan saltanatty is-sharaǵa qatysyp, barsha qazaqstandyqtyń táý eter tuǵyry – Táýelsizdiktiń qundylyǵy, elimizdiń 30 jylda qol jetkizgen jetistigi týraly jan-jaqty aityp ótti.
«Biz – erkindikke qoly jetken, arman-muraty teń órilgen dana halyqpyz. Biz – taiqazany ortaimaǵan qazaq degen baitaq elmiz. Mine, sol baqyt túndigin ashqan Táýelsizdik búginde qut-berekege ainaldy. Biz búgin osy qubylysty erekshe sezinip turmyz. Qazaqstan – yntymaqty uran, tatýlyqty tý etken beibit el. Búgingi memleketimizdiń qarqyndy damýy – turaqty saiasat pen ishki birliktiń, ulttyq qasietimiz ben ulttyq qundylyqtarymyzdy ulyqtai bilgenimizdiń jemisi. Sondyqtan, birligimiz bekem, tirligimiz tiianaqty bolǵanda ǵana Táýelsizdiktiń týy máńgi jelbireitinin esten shyǵarmaǵanymyz abzal», - dedi Memlekettik hatshy.
Qyrymbek Kósherbaev el Táýelsizdigin tuǵyrly etýge, elimizdiń áleýmettik- ekonomikalyq damýyna Atyraý oblysynyń erekshe úles qosyp kele jatqanyn atap ótti.
Memlekettik hatshy saltanatty is-shara sońynda Prezident Jarlyǵymen berilgen memlekettik nagradalardy ártúrli salada el mereiin asyryp júrgen bir top atyraýlyqqa tapsyrdy.
