Prezidenttikke óz kandidatýrasyn usynyp, qazaqstandyqtardyń 16,23%-iniń daýsyn jinaǵan Ámirjan Qosanov sailaý qorytyndysy men óziniń aldaǵy jospary týraly aitty.
"Oppozitsiia ózgerýi tiis"
Ol eń aldymen, ózine qoldaý kórsetken sailaýshylarǵa alǵysyn bildirgen.
"Meni qoldap sailaýshylardyń 16 protsenti daýys berdi, ol - bir jarym million qazaqstandyq degen sóz. Qazaqstan oppozitsiiasynyń birde-bir ókili (tutas partiialar men qozǵalystardy qosqanda) osyǵan deiin bolǵan prezidenttik jáne parlamenttik sailaýda dál osyndai kórsetkishke qol jetkize almady. Bul bizdiń barshamyzdyń ortaq jetistigimiz", - dedi Qosanov óziniń Facebook-tegi resmi paraqshasynda.
Sondai-aq, ol óziniń sailaý kezinde usynǵan baǵdarlamasynan bas tartpaitynyn jazǵan. Demokratiialyq qundylyqtardy qorǵap, qoǵam men bilik arasyndaǵy dialog ornatýǵa baryn salatynyn aitqan.
"Biz árdaiym bilik ózgerýi kerek deimiz. Meniń oiymsha, oppozitsiia da ózgerýi tiis. Onyń quramyna enetin adamdar baǵdarlamalary men aldaǵy is-áreketterin aiqyndap alýy tiis. Demokratiialyq kúshter arasyndaǵy óziniń ornyn tabýy kerek " , - dedi ol.
Qosanov óziniń aldaǵy josparymen de bólisti. Qoǵamnyń basym bóligi ony qoldaitynyna senim bildirgen.
"Meniń endigi missiiam – demokratiialyq printsipterdi tabandy da tegeýrindi qorǵap otyryp, bilik úshin zań aiasynda kúresetin qoǵam belsendileriniń jańa tolqynyna, jańa oppozitsiiaǵa institýttyq sipat berý. Óitkeni, jańasha jaǵdaida oppozitsiialyq kóńil-kúiler sailaý barysynda legitimdendi, qoǵamdaǵy ekinshi kúshke ainaldy!", - dep jazady Qosanov.
Qosanovtyń ekzit-pýldan keiin bergen suqbatyna qatysty biraz syn aitylǵan bolatyn. Ol osy jaitty túsindirip ótti.
"Sailaý aldynda bilik óz zertteýlerinde maǵan 5 jáne 7,9 paiyz beretindei syńai tanytqanyn ózderińiz bilesizder. Ondai boljaýlardy biz synadyq, qabyldamadyq.
Sondyqtan da daýys berý barysyndaǵy ekzit-pýl kezinde 15,9 paiyz jariialanǵanyn óz basym oń nátije dep sanap, sondai kommentarii bergenim ras. Onyń ústine ádette ekzit-pýl men resmi nátijeniń arasy alshaq bolmaidy emes pe?", - dedi ol.
Óz jazbasynda Qosanov turǵyndardy zańsyz narazylyq aktsiialaryna shaqyrmaitynyn aitty. Sailaýdan keiin densaýlyǵy syr berip, aýrýhanaǵa túskenin de jazǵan.
Prezident sailaýy - 2019
Eske sala ketsek, 9 maýsym kúni bolǵan kezekten tys sailaýǵa jeti úmitker óz kandidatýrasyn usyndy.
Sailaýshylardyń basym bóliginiń senimine ie bolǵan Qasym-Jomart Toqaev Qazaqstan prezidenti bolyp sailandy. Ekinshi orynǵa "Ult taǵdyry" qozǵalysy atynan sailaýǵa túsken Ámirjan Qosanov, al úshinshi orynǵa "Aq jol" demokratiialyq partiiasynyń kandidaty, jalǵyz áiel úmitker Daniia Espaeva jaiǵasty.
-
Qasym-Jomart Toqaev - 70,96%
-
Ámirjan Qosanov - 16,23%
-
Daniia Espaeva -5,05 %
-
Tóleýtai Raqymbekov - 3,04%
-
Amangeldi Taspihov -1,98 %
-
Jambyl Ahmetbekov -1,82%
-
Sádibek Túgel - 0,92%.
