Shymkentte «Dene shynyqtyrý jáne sport» basqarmasynyń bastyǵy Oleg Pochivalovtyń aryzy Ál-Farabi aýdandyq sotynda qaraldy. Atalǵan sottyń sýdiasy Nurǵali Ismailov basqarma basshysynyń Resei Federatsiiasynyń azamaty ekeni tolyq dálelin tapqanyn aityp, onyń talap aryzyn qanaǵattandyrýsyz qaldyrdy, dep habarlaidy "Ult aqparat".
Sýdia, tipti, sheneýnik Pochivalovtyń sotqa dálel retinde qandai da bir qujat usynbaǵanyn jetkizdi.
«Pochivalovqa qatysty azamattyq isti qaraý barysynda onyń Resei Federatsiiasynyń azamattyǵyn alǵany tolyq óz dálelin tapty. Bul UQK-niń Shymkent qalasy boiynsha departamentiniń jáne de Resei Federatsiiasynyń Ishki ister ministrliginiń jaýaptarymen dáleldendi. Sol sebepti qalalyq politsiia departamentiniń áreketi zańdy dep sotpen sheshim qabyldandy. Sot sheshimi bir aidan soń ǵana kúshine enedi», - dedi sýdia Nurǵali Ismailov.
Aita keteiik, shymkenttik sheneýnik buǵan deiin ózinde qos eldiń azamattyǵy bar dep aqparat taratqan politsiianyń habarlamasy jalǵan ekenin habarlaǵan bolatyn. Sóitip politsiianyń áreketin zańsyz dep taný úshin sotqa talap aryz túsirgen.
«2005 jyly Pochivalov Resei Federatsiiasynyń azamattyǵyn alǵan, 2007 jyly pasportyn alǵan. Sol qujattardyń barlyǵy Resei Federatsiiasy Ishki ister ministrliginiń hattarymen óz dálelin tapty. Eki azamattyqtyń anyqtalýyna bailanysty Pochivalovqa qatysty QR-nyń azamattyǵynan aiyrý jóninde másele qoiylǵan», - dedi sýdia.
Eske salaiyq, sońǵy kezde laýazymdy tulǵanyń Qazaqstannyń ǵana emes, Resei azamaty ekeni de áleýmettik jelide keńinen taraǵan. Biraq Pochivalovtyń ózi munyń bári "áldekimderdiń uiymdastyrǵany" dep jaýap berip edi.
