Qazaqstanda qoryqshy inspektorlarǵa oq ótkizbeitin keýdeshe berilýi múmkin. Qazir bul másele Ishki ister ministrliginde qarastyrylyp jatyr, dep habarlaidy QazAqparat.
QR Ekologiia, geologiia jáne tabiǵi resrýrstar vitse-ministri Erlan Nysanbaev búgin Ortalyq kommýnikatsiialar qyzmetinde ótken brifingte osyndai málimet berdi.
«Qazirgi tańda bizdiń inspektorlarymyz qajetti qarýmen qamtylǵan. Al oq ótpeitin keýdeshe berý máselesin Ishki ister ministrligimen birge qarap jatyrmyz. Bizdiń inspektorlarǵa da politsiia qyzmetkerleri siiaqty oq ótkizbeitin keýdeshe kiiýge ruqsat alýdamyz. Bolashaqta bul naqty sheshiledi. Ol úshin normativtik-quqyqtyq aktilerge ózgeris engizsek boldy. Bul jumysty endi ǵana bastadyq», - dedi Erlan Nysanbaev.
Ministrlik ókili keleshekte qoryqshy inspektorlardyń arnaiy jabdyqtalǵan qyzmettik kólikteri de bolatynyn aitty.
«Inspektorlardyń qazasynan keiin Bas prokýratýramen jáne ózge de múddeli memlekettik organdarmen birge Pralament Májilisinde keńes ótkizdik. Sonyń nátijesinde jedel aldyn alý sharalaryna qatysty zańnamany kúsheitý týraly tapsyrma berildi. Brakonerlermen kúreste qyzmettiń materialdyq-tehnikalyq bazasyn nyǵaitý boiynsha naqty sharalar atqarylady. Drondar men keýdege taǵylatyn beinekameralar, elektroshoker men travmatikalyq qarý, jeke qorǵanys quraldary sol sharada qarastyrylǵan. Jol júrý erejesine bizdiń inspektorlar minetin kólikterdi arnaiy tehnika retinde tirkeý týraly ózgerister engiziledi», - dedi Erlan Nysanbaev.
Eske salsaq, Erlan Nysanbaev brifing barysynda brakonerler bir jarym jylda 700-den astam kiikti qyryp salǵanyn aitqan bolatyn.
