قازاقستاندا قورىقشى ينسپەكتورلارعا وق ٶتكٸزبەيتٸن كەۋدەشە بەرٸلۋٸ مٷمكٸن. قازٸر بۇل مەسەلە ٸشكٸ ٸستەر مينيسترلٸگٸندە قاراستىرىلىپ جاتىر, دەپ حابارلايدى قازاقپارات.
قر ەكولوگييا, گەولوگييا جەنە تابيعي رەسرۋرستار ۆيتسە-مينيسترٸ ەرلان نىسانباەۆ بٷگٸن ورتالىق كوممۋنيكاتسييالار قىزمەتٸندە ٶتكەن بريفينگتە وسىنداي مەلٸمەت بەردٸ.
«قازٸرگٸ تاڭدا بٸزدٸڭ ينسپەكتورلارىمىز قاجەتتٸ قارۋمەن قامتىلعان. ال وق ٶتپەيتٸن كەۋدەشە بەرۋ مەسەلەسٸن ٸشكٸ ٸستەر مينيسترلٸگٸمەن بٸرگە قاراپ جاتىرمىز. بٸزدٸڭ ينسپەكتورلارعا دا پوليتسييا قىزمەتكەرلەرٸ سيياقتى وق ٶتكٸزبەيتٸن كەۋدەشە كييۋگە رۇقسات الۋدامىز. بولاشاقتا بۇل ناقتى شەشٸلەدٸ. ول ٷشٸن نورماتيۆتٸك-قۇقىقتىق اكتٸلەرگە ٶزگەرٸس ەنگٸزسەك بولدى. بۇل جۇمىستى ەندٸ عانا باستادىق», - دەدٸ ەرلان نىسانباەۆ.
مينيسترلٸك ٶكٸلٸ كەلەشەكتە قورىقشى ينسپەكتورلاردىڭ ارنايى جابدىقتالعان قىزمەتتٸك كٶلٸكتەرٸ دە بولاتىنىن ايتتى.
«ينسپەكتورلاردىڭ قازاسىنان كەيٸن باس پروكۋراتۋرامەن جەنە ٶزگە دە مٷددەلٸ مەملەكەتتٸك ورگاندارمەن بٸرگە پرالامەنت مەجٸلٸسٸندە كەڭەس ٶتكٸزدٸك. سونىڭ نەتيجەسٸندە جەدەل الدىن الۋ شارالارىنا قاتىستى زاڭنامانى كٷشەيتۋ تۋرالى تاپسىرما بەرٸلدٸ. براكونەرلەرمەن كٷرەستە قىزمەتتٸڭ ماتەريالدىق-تەحنيكالىق بازاسىن نىعايتۋ بويىنشا ناقتى شارالار اتقارىلادى. دروندار مەن كەۋدەگە تاعىلاتىن بەينەكامەرالار, ەلەكتروشوكەر مەن تراۆماتيكالىق قارۋ, جەكە قورعانىس قۇرالدارى سول شارادا قاراستىرىلعان. جول جٷرۋ ەرەجەسٸنە بٸزدٸڭ ينسپەكتورلار مٸنەتٸن كٶلٸكتەردٸ ارنايى تەحنيكا رەتٸندە تٸركەۋ تۋرالى ٶزگەرٸستەر ەنگٸزٸلەدٸ», - دەدٸ ەرلان نىسانباەۆ.
ەسكە سالساق, ەرلان نىسانباەۆ بريفينگ بارىسىندا براكونەرلەر بٸر جارىم جىلدا 700-دەن استام كيٸكتٸ قىرىپ سالعانىن ايتقان بولاتىن.
