Kiik múiizimen ainalysqandar 5 jylǵa deiin bas bostandyǵynan aiyrylady. Bul týraly Parlament Májilisiniń jalpy otyrysynda qylmystyq-protsestik zańnamany jetildirý máselelerin talqylaý barysynda QR Bas prokýrorynyń orynbasary Marat Ahmetjanov málim etti, dep habarlaidy QazAqparat.
«Ókinishke qarai, kiikti zańsyz aýlaý áli de jalǵasyn tabýda. Sondyqtan zańsyz kiik múiizimen ainalysqany úshin jeke quram qarastyrylyp otyrmyz. Jazasy qatal, 5 jylǵa deiin bas bostandyǵynan aiyrý kózdelgen. Aiyppul bolmaidy. Sebebin túsindirip keteiik. Bul túzetýdiń mánisi joǵary rýhani tárbielik astary bar desem de bolady. Kei jerde aq bóken deimiz, kiik, halqymyzdyń kieli sanaityn janýary. Keń dalada baiaǵy zamannan erkin ósken, onyń tirshiligi aiasy da bizdiń dala. Osynda qys qystap, jaz jailaidy, kóktemde quralai óredi. Qazir naqty tosqaýyl qoiatyn kez keldi. Áitpese, kiikten múldem aiyrylyp qalý qaýipi bar», - dedi M. Ahmetjanov.
Onyń sózine qaraǵanda, tabiǵatymyzdy, ań qustarymyzdy qorǵaityn inspektordy jáne qoryqshynyń ómirine qaýip tóndirip, kúsh qoldanǵany úshin jaýapkershilik engizý qarastyrylǵan. Osyndai qylmystar úshin jiyrma jylǵa deiin bas bostandyǵynan aiyrý bolady.
Aita keteiik, búgin jalpy otyrysta palata depýtattary «Qazaqstan Respýblikasynyń keibir zańnamalyq aktilerine qylmystyq jáne qylmystyq-protsestik zańnamany jetildirý máseleleri boiynsha ózgerister men tolyqtyrýlar engizý týraly» zań jobasy talqylanyp jatyr. Osy oraida urlyqqa qatysty áreketter aýyr qylmystar sanatyna kóshetini málim boldy.
Budan buryn habarlanǵandai, janýarlar álemine qarsy qylmystarǵa jaza kúsheitiledi.
