Prezident Qasym-Jomart Toqaev Ortalyq Aziia elderine shekarany shegendeýdiń tiimdi tásilderin ázirleitin sarapshylyq alań qurýdy usyndy, dep habarlaidy "Ult aqparat".
«Biz, memleketter basshylary óńirdegi áli de saqtalyp otyrǵan turaqsyzdyq faktorlaryn barynsha joiý úshin barlyq múmkindikti jasaýǵa tiispiz. Memleketaralyq shekaralardaǵy árbir myltyq daýsynyń jańǵyryǵy eki elge ǵana emes, búkil óńirge jaǵymsyz áser etedi. Kerisinshe, dál qazirgi daǵdarys jaǵdaiynda memleketterimiz qaishylyqtardy eńserý isinde órkeniettiliktiń, jaýaptylyqtyń úlgisin kórsetýge tiis. Shekarany zańdy túrde rásimdeý úderisiniń óte kúrdeli ári qiyn ekenin óz tájiribemizden bilemiz. Daýly máseleler shynaiy tatý kórshilik pen halyqaralyq quqyqtyń irgeli qaǵidattaryna qurmet kórsetý arqyly tek qana beibit jolmen sheshilýi múmkin», – dedi Toqaev Ortalyq Aziia memleketteri basshylarynyń IV Konsýltativtik kezdesýinde.
Prezidenttiń aitýynsha, bunyń basqa joly joq.
«Bul keshendi problemalardy elemeýdiń nemese sozbalańǵa salýdyń saldary qiyn bolady, tipti Ortalyq Aziiadaǵy yntymaqtastyqty damytýǵa baǵyttalǵan barlyq kúsh-jigerimizdi joqqa shyǵarýy múmkin. Postkeńestik keńistikte óziniń shekarasyn tolyq delimitatsiia jasaǵan memleket retinde, Qazaqstan, ózara tiimdi sheshimder izdestirýge barynsha kómek kórsetýge daiyn. Naqtyraq aitqanda, shekarany delimitatsiialaýdyń ózara tiimdi tásilderin ázirleý úshin sarapshylar alańyn qurýdy usynamyz. Bul jumysqa tájiribeli zańgerler, kartograftar, shekarashylar jáne basqa da mamandardy tartý kerek. Osy iste úilestirý mindetin Syrtqy ister ministrler keńesine júkteýge bolady» – dedi Memleket basshysy.
