«Aq jol» partiiasy shikizat eksportyn tejeý jáne Ózbekstanǵa óńdelgen ónimderdiń eksportyn yntalandyrý baǵytynda ulttyq ekonomikanyń múddesin qorǵaýdy qajet dep sanaidy. Osy oraida Májilistiń jalpy otyrysynda depýtat Azat Perýashev Úkimetke saýal joldady, dep habarlaidy "Ult aqparat".
«Eksportty damytý – bul memlekettik ekonomikalyq saiasattyń mańyzdy baǵyttarynyń biri jáne otandyq óndirýshilerdiń naqty básekege qabilettiliginiń aiqyn kórinisi. Alaida, eksporttyń damýyna tek kásipkerlerdiń kúsh-jigeri ǵana emes, sonymen qatar potentsialdy eksporttaýshy elderdiń qazaqstandyq taýarlarǵa qatysty shekteý sharalary da áser etedi. TMD elderindegi Qazaqstannyń mańyzdy saýda seriktesteriniń biri – bul bizdiń jaqyn kórshimiz Ózbekstan Respýblikasy. Kórshi elmen 2019 jyldyń sońynda saýda kólemi 2,7 milliard AQSh dollarynan asqan. Alaida, bul kórsetkishter áldeqaida joǵary, al eksport qurylymy áldeqaida kúrdeli jáne tabysty bolýy múmkin», - dedi A. Perýashev Premer-Ministr Asqar Maminge joldanǵan depýtattyq saýalynda.
Osy oraida ol 1997 jyly eki el arasynda erkin saýda týraly Kelisim jasalǵanyn eske saldy. Sonymen qatar, 2013 jylǵy 31 mamyrdaǵy Hattamamen Ózbekstan 2011 jylǵy 18 qazandaǵy Erkin saýda aimaǵy týraly kelisimge qosyldy. Soǵan sáikes Kelisimge qatysýshy memleketter jáne Ózbekstan taraptarǵa kedendik aýmaǵynan shyqqan taýarlardy ákelýge kedendik bajdardy qoldanbaýdy mindeti aldy.
«Soǵan qaramastan, búginde Ózbekstan tarapy 96 taýarlyq pozitsiiaǵa taýarlardyń kedendik qunynan 5-ten 50 paiyzǵa deiin aktsizdik salyq belgiledi. Sonymen qatar, olar shikizat (eń aldymen aýyl sharýashylyǵy: bidai, maily daqyldar, et pen janýarlardyń terisi jáne t.b.) eksportyn yntalandyryp, qazaqstandyq óńdelgen ónimderdiń importyn ádeii shekteidi. Bolashaqta bul Ózbekstanda shikizattar óńdelip, sol qosymsha qun, jumys oryndary men joǵary paida ákeledi. Al qazaqstandyq shikizattan óndirilgen ónimniń bir bóligi odan ary qarai, sonyń ishinde Qazaqstan naryǵyna eksporttalady. Qazaqstanda ózbekstandyq taýarlarǵa aktsizder nemese salyqtar salynbaidy. Mundai jaǵdaida otandyq taýar óndirýshilerge ózbekstandyq taýar óndirýshilerimen tek ózbek naryǵynda ǵana emes, sonymen qatar óz elimizde de básekege túsý qiyn», - dedi depýtat.
Onyń sózine qaraǵanda, Qazaqstan men Ózbekstan bir-birine «erkin saýda» rejimin, iaǵni taýarlardyń eksporty men importy úshin teń jaǵdailardy qamtamasyz etýi kerek. Is júzinde, qazaqstandyq kásipkerler daiyn ónimdi emes, óńdelmegen shikizatty satýǵa májbúr bolyp, alatyn paidasynyń edáýir bóligin joǵaltyp otyr.
«Biz ózbek sheneýnikteriniń óz memleketine degen qamqorlyǵyn túsinemiz. Biraq bizdiń memlekettik organdar ózderiniń ulttyq múddelerin nege oilamaitynyn túsinbeimiz? Árine, ózbek halqy – qudai qosqan dos kórshimiz. «Aq jol» QDP depýtattyq fraktsiiasy osy aitylǵandarǵa bailanysty másele úkimetaralyq deńgeide sheshilgenge deiin, shikizat eksportyn tejeý jáne Ózbekstanǵa óńdelgen ónimderdiń eksportyn yntalandyrý, sondai-aq kórshi respýblikadan taýarlarǵa qosymsha salyq salýdy yntalandyrý úshin osyndai ashyq kedendik saiasatty júrgizý arqyly ulttyq ekonomikanyń múddesin qorǵaýdy qajet dep sanaidy», - dedi Azat Perýashev.
