QR Premer-Ministri Asqar Maminniń tóraǵalyǵymen ótken Úkimet otyrysynda elimizdiń áleýmettik-ekonomikalyq damýynyń jáne 2020 jylǵy qańtar-qyrkúiektegi respýblikalyq biýdjettiń atqarylýynyń qorytyndylary qaraldy, dep habarlaidy primeminister.kz saity.
Ekonomikanyń bazalyq salalarynda qabyldanyp jatqan sharalardyń arqasynda osy jyldyń toǵyz aiynyń qorytyndysy boiynsha ósýdiń oń serpini saqtalýda. Óńdeý ónerkásibinde 3,3%-ǵa, onyń ishinde farmatsevtikada 39,8%-ǵa, daiyn metall buiymdaryn óndirýde 18,9%-ǵa, mashina jasaýda 16,6%-ǵa, onyń ishinde avtomobil jasaýda 51,6%-ǵa, sondai-aq qaǵaz ónimderi óndirisinde 15,1%-ǵa jáne jeńil ónerkásipte 14,1%-ǵa ósim qamtamasyz etildi.
Qurylys kólemi 10,5%-ǵa, turǵyn úidi paidalanýǵa berý 9%-ǵa nemese shamamen 9,6 mln sharshy metrge ulǵaidy. Aýyl sharýashylyǵynda 5%-ǵa turaqty ósim qamtamasyz etildi, jaqsy ónim jinaldy. QR altyn-valiýta rezervteri men Ulttyq qordyń aktivteri biylǵy 1 qazanda $91,1 mlrd qurady.
Metall kenin (+1,2%) jáne ózge de paidaly qazbalardy (+0,4%) óndirý sekildi taý-ken sektorynyń mańyzdy baǵyttary boiynsha oń dinamika saqtalýda. Bul rette OPEK+ qol jetkizilgen ýaǵdalastyqtardy oryndaý qajettiligi jaǵdaiynda munai óndirýdiń tómendeýi (-3,5%) baiqalady.
Qyrkúiekte qyzmet kórsetý sektory belsendi túrde jandana bastady – tamyz aiymen salystyrǵanda, saýda-sattyq 2,7%-ǵa, bailanys 1,3%-ǵa, kólik jáne qoimalaý 1,2%-ǵa ósti. Qyzmet kórsetý sektorynyń ósýi shaǵyn jáne orta biznestiń belsendiligin kórsetedi, bul jańa jumys oryndaryn qurýǵa jáne azamattardyń ál-aýqatyn jaqsartýǵa yqpal etedi.
«Kórsetkishterdiń turaqty ósý úrdisi jalpy ekonomikanyń qalpyna kelýin kórsetedi», — dedi Mamin.
Aqmola, Almaty, Jambyl, Qostanai, Pavlodar, Soltústik Qazaqstan oblystary jáne Shymkent qalasy negizgi 7 kórsetkishtiń 5-i boiynsha áleýmettik-ekonomikalyq damýdyń ósýin qamtamasyz etti. Aqtóbe, Qaraǵandy, Mańǵystaý, Túrkistan, Shyǵys Qazaqstan oblystarynda, Nur-Sultan jáne Almaty qalalarynda 4 kórsetkish boiynsha oń dinamikaǵa qol jetkizildi. Munai-gaz sektoryndaǵy óndiristiń tómendeýine bailanysty artta qalǵan óńirler arasynda Qyzylorda, Atyraý jáne Batys Qazaqstan oblystary bar.
«Jalpy, Qazaqstan ekonomikasy pandemiia men jahandyq ekonomikalyq daǵdarystyń eleýli áserine qaramastan, naqty sektorda da, qyzmet kórsetý salasynda da kórsetkishterdiń ósýin kórsetýde», — dedi Mamin.
Úkimet basshysy óńirlerdiń ákimderine Memleket basshysy alǵa qoiǵan barlyq mindetterdi tiimdi iske asyrýdy qamtamasyz etý úshin jumysty jandandyrýdy tapsyrdy.
«Biýdjettiń kiris bóligine qatysty jyl sońyna deiin bekitilgen jospardyń 100% oryndalýyna qol jetkizý qajet. Qazirgi jaǵdailarda biýdjettiń atqarylýy turǵysynan ortalyq jáne jergilikti organdardyń basshylary jyl sońyna deiin tiimdi jáne ýaqytyly igerýdi qamtamasyz etýi tiis. Jyl sońyna deiin 3 ai qaldy jáne barlyq jobalardy aiaqtap, josparlardy iske asyrý úshin barlyq kúsh-jigerdi jumsaý qajet», — dep atap ótti Premer-Ministr.
Aita keteiik, jiynda ekonomikanyń, bank salasynyń jai-kúii, respýblikalyq biýdjettiń atqarylýy, memlekettik satyp alýdaǵy jergilikti qamtý týraly ulttyq ekonomika ministri R. Dálenov, Ulttyq bank tóraǵasy E. Dosaev, qarjy ministri E. Jamaýbaev, ónerkásip pen energetika sektoryndaǵy ahýal týraly indýstriia jáne infraqurylymdyq damý ministri B. Atamqulov jáne energetika ministri N. Noǵaev, agroónerkásiptik keshendegi jaǵdai týraly aýyl sharýashylyǵy ministri S. Omarov baiandady.
