Jańa koronavirýstyń inkýbatsiialyq kezeńi eki apta emes, 24 kúnge sozylýy múmkin.
Mundai tujyrym belgili epidemiolog Chjýn Nanshan bastaǵan QHR Densaýlyq saqtaý isi jónindegi memlekettik komitettiń saraptaý komissiiasy júrgizgen zertteý nátijesinde jasaldy, dep habarlaidy QazAqparat medRxiv meditsinalyq serverine silteme jasap.
Zertteý osy jyldyń 1-29 qańtary aralyǵynda QHR-dyń 31 ákimshilik-aýmaqtyq bólimindegi 552 aýrýhanada jańa koronavirýs infektsiiasyn juqtyrǵan 1000-nan astam naýqasqa júrgizilgen. Onyń barysynda ortasha inkýbatsiialyq kezeń úsh kúnge jalǵasatyny anyqtaldy, eń kóbi 24 kúnge jetýi múmkin.
Bul rette 1099 naýqastyń tek 1,18%-y jabaiy tabiǵatpen tikelei bailanysta bolǵan.
Olardyń úshten bir bóligi Ýhan qalasynda (Hýbei provintsiiasy, Ortalyq Qytai) bolǵan, al 71,8% Ýhannan, epidemiia oshaǵynan kelgen adamdarmen bailanysqan. Bul - koronavirýstyń adamnan adamǵa berilýiniń taǵy bir dáleli. Alynǵan nátijeler boiynsha, koronavirýs óziniń otbasy múshelerinen jii juǵatyny rastaldy.
Zertteý kóptegen basqa adamdarǵa qaraǵanda asa úlken kólemde infektsiia beretin «sýper taratýshylardyń» bolýyn joqqa shyǵarmaidy. Mundai taratý joly jańa koronavirýstyń tez taralýyna yqpal etýi múmkin.
Qytai dárigerleri koronavirýs tek aýa-tamshy jolymen jáne tyǵyz bailanys arqyly ǵana emes, nájis arqyly beriletinin de anyqtady.
Bul rette koronavirýsty diagnostikalaý ádisinde kóptegen aýrý juqtyrǵandardyń anyqtalmai qalýyna ákelýi múmkin aqaýlar bolýy múmkin, delingen zertteý jumysynda.
Zertteýde meditsinalyq qyzmetkerlerdiń de aýrý juqtyryp jatqany aitylǵan. Medpersonaldyń jańa koronavirýsqa shaldyǵý koeffitsienti 1099 naýqastyń arasynda 2,09%-dy qurady.
Dúniejúzilik densaýlyq saqtaý uiymy (DDU) Jenevada 11-12 aqpanda koronavirýsqa qarsy kúreske kúsh-jigerdi jumyldyrý maqsatynda zertteýler men innovatsiialar boiynsha jahandyq forýmǵa shaqyrýda.
Forýmǵa jetekshi ǵalymdar, densaýlyq saqtaý uiymdarynyń ókilderi men meditsina qyzmetkerleri jinalady. Pikirtalas barysynda virýsty diagnostikalaý, aldyn alý jáne emdeý ádisteri, sondai-aq vaktsinalardy ázirleý talqylanady.
