Koronavirýsty emdeýge qoldanylatyn dárilerdiń barlyǵy eksperimenttik preparat sanalady. Bul týraly Qaraǵandy meditsina institýtynyń klinikalyq jumystar jónindegi prorektory, COVID-19 boiynsha klinikalyq hattamany ázirleýshi toptyń jetekshisi Baqyt Kósherova aitty, dep habarlaidy QazAqparat.
«Koronavirýs indetin diagnostikalaý men emdeý ulttyq klinikalyq hattamasynyń alǵashqy nusqasy osy jyldyń 3 aqpanynda jasaldy. Hattamanyń alǵashqy nusqasyn halyqaralyq usynystar bolmaǵan kezde, Dúniejúzilik densaýlyq saqtaý uiymy eshqandai nusqaýlyq shyǵarmaǵan kezde ázirlegen edik. Sodan beri shamamen 8 ai ótti. Biz diagnostikalaý men emdeýdiń klinikalyq hattamasyn 10 ret ózektendirdik. Qazirgi jaǵdaida koronavirýs infektsiiasyn emdeýge infektsionister, anesteziologtar, reanimatologtarmen qatar ózge sala dárigerleri de tartylady», - dedi meditsina ǵylymdarynyń doktory koronavirýstyń ekinshi tolqynyn talqylaýǵa arnalǵan onlain jiynda.
Osy rette ol maýsym men shilde aiynda elimizde oryn alǵan indetke shaldyǵý kórsetkishiniń belgili bir deńgeide sabaq bolǵanyn aitady.
«Óte kúrdeli bolǵanyna qaramastan dárigerler bizdiń hattamany qoldandy. Barlyq medikamentter koronavirýs infektsiiasyn diagnostikalaý jáne emdeýdiń ulttyq klinikalyq hattamasyna sáikes satyp alyndy. Hattama jasaý - úlken eńbekti qamtityn jumys. Biz koronavirýs infektsiiasyn emdeýde qoldanylatyn halyqaralyq tásil men úzdik tájiribeni qoldanamyz. Búgin ǵana Dúniejúzilik densaýlyq saqtaý uiymynyń sarapshylarymen onlain kezdesý ótkizdik. Olar bizge koronavirýs indetin emdeýge qoldanatyn barlyq preparattyń esperimenttik dári-dármek ekendigin aityp otyr. Búgingi kúni olardyń 100 paiyz tiimdiligi dáleldenbegen», - dedi Baqyt Kósherova.
