Qazaqstanda koronavirýs juqtyryp alǵan meditsina qyzmetkerlerine arnalǵan ótemaqy 17 qazanǵa deiin tólenip bitýi tiis, dep habarlaidy "Ult aqparat".
Búgin QR Premer-Ministriniń orynbasary Eraly Toǵjanovtyń tóraǵalyǵymen ótken Vedomstvoaralyq komissiianyń otyrysynda Memleket basshysy Q. Toqaevtyń koronavirýs pandemiiasynyń ekinshi tolqynyna daiyndyq máseleleri jónindegi 7 qazandaǵy keńeste bergen tapsyrmalaryn oryndaý boiynsha naqty sharalar ázirlendi.
Jiynda Eraly Toǵjanov koronavirýstan kóz jumǵan meditsina qyzmetkerleriniń otbasyna jáne qyzmet babynda indet juqtyrǵan medqyzmetkerlerge tólenetin ótemaqy jaiyna da toqtaldy.
«Keshe Qasym-Jomart Kemeluly kóz jumǵan 182 meditsina qyzmetkeriniń otbasylaryna, sondai-aq qyzmet atqarý kezinde COVID-19-ben aýyrǵan dárigerlerge ótemaqy tóleý boiynsha jedel sharalar qabyldaýdy tapsyrdy. Osyǵan bailanysty óńirlerdiń ákimdikterine, densaýlyq saqtaý, eńbek jáne halyqty áleýmettik qorǵaý ministrlikterine meditsina qyzmetkerleriniń qaitys bolý faktisi boiynsha ótemaqy tóleýdi ústimizdegi jyldyń 13 qazanynda aiaqtaýdy tapsyramyn. Sondai-aq aǵymdaǵy jylǵy 17 qazanda óńirlik komissiialarda ótinimderi qaralǵan kásibi qyzmetti júzege asyrý kezinde aýyrǵan dárigerlerge ótemaqy taǵaiyndaýdy aiaqtaýdy qamtamasyz etý qajet» , – dedi E. Toǵjanov.
Aita keteiik, keshe Memleket basshysy Qasym-Jomart Toqaev koronavirýstan qaitys bolǵan dárigerdiń otbasyna tekserý júrgizilmesten tólemaqy berilýi kerektigin aitqan edi.
Prezident dereginshe, 2020 jyldyń 30 qyrkúiegindegi jaǵdaiǵa sáikes, indet kezeńinde koronavirýstan 182 meditsina qyzmetkeri qaitys bolǵan.
«Qazir bul jaǵdailar túrli komissiiada qaralyp, ótemaqy tek 37 ǵana otbasyna ǵana tólengen. Múldem jol berýge bolmaityn jaǵdai. Postfaktým ólim sebebin anyqtaý kóptegen qiyndyqtardy, onyń ishinde ádep sipatyndaǵy qiyndyqtardy týdyrady. Osyǵan orai Úkimetke bul máselede mundai tekserýler júrgizbesten qaza tapqan meditsina qyzmetkeriniń otbasyna tiesili barlyq tólemaqyny tóleýdi tapsyramyn», - dedi Qasym-Jomart Toqaev.
Sonymen qatar Memleket basshysy meditsina qyzmetkerleri qyzmet barysynda aýrý juqtyryp alǵany dáleldengen jaǵdaida qysqa merzimniń ishinde tólemaqy múltiksiz tólenýi tiistigin basa aitty.
«Koronavirýspen kúres úshin ústemaqynyń bir bóligin ákimshileý ákimdikterdiń jelisi arqyly júrgiziledi. Osyǵan orai óńir ákimderine bul máseleni jeke baqylaýda ustaýdy tapsyramyn», - dedi QR Prezidenti.
