Qazaqstanda koronavirýstan jazylǵan 6341 meditsinalyq qyzmetkerge ótemaqy berildi. Bul týraly Densaýlyq saqtaý ministri Aleksei Tsoi málim etti, dep habarlaidy "Ult aqparat".
«Búgingi tańda aimaqtyq komissiialar koronavirýstan kóz jumǵan jaǵdailar boiynsha jumysty aiaqtap, ótemaqy tóleý boiynsha ótinimderdi qabyldap jatyr. Osylaisha koronavirýstan kelgen ólimge qatysty 182 ótinim tústi. Kásibi mindetin oryndaý ýaqytynda koronavirýstan kóz jumǵan 182 meditsinalyq qyzmetkerdiń otbasyna 10 mln teńge kóleminde áleýmettik ótemaqy taǵaiyndaldy. Osylaisha Memleket basshysynyń tergep-tekserýsiz qaitys bolǵandardyń otbasyna ótemaqy tóleý týraly tapsyrmasy oryndaldy», - dedi Aleksei Tsoi OKQ-da ótken baspasóz máslihatynda.
Ministr sonymen qatar kásibi mindetin atqarý kezinde koronavirýs juqtyryp, jazylyp shyqqan 6 341 meditsina qyzmetkerine ótemaqy berilgenin málim etti.
«Osynaý qurǵaq kórinetin sandardyń artynda pandemiia kezinde batyrlyq tanytqan myńdaǵan meditsinalyq qyzmetkerdiń erligi jatyr. Qaitys bolǵan áriptesterimizdi qaiǵyra eske ala otyryp, olardyń otbasyna, týǵan-týystaryna kóńil aitamyz», - dedi ol.
